haal kahne ki kise tab is aazar ke bich

haal kahne kī kise taab is āzār ke biich

haal rahtā hī nahīñ ishq ke bīmār ke biich

ārzū-mand hai ḳhurshīd mayassar hai kahāñ

ki tanik Thahre tire sāya-e-dīvār ke biich

kyā kaheñ ham ki gale Daale phireñ mastī meñ

daane sub.ha ke piro rishta-e-zunnār ke biich

rashk-e-ḳhūbī kā isī ke jigar-e-mah meñ hai daaġh

ye jo ik ḳhaal paḌā hai tire ruḳhsār ke biich

mil gayā phūloñ meñ is rang se karte hue sair

ki ta.ammul kiye paayā use gulzār ke biich

qadr go tum na karo merī matā-e-dil kī

jins lag jāvegī ye bhī kisū sarkār ke biich

gard-e-sar-rafta haiñ ai 'mīr' ham us kushte ke

rah gayā yaar kī jo ek hī talvār ke biich

haal kahne ki kise tab is aazar ke bich

haal rahta hi nahin ishq ke bimar ke bich

aarzu-mand hai KHurshid mayassar hai kahan

ki tanik Thahre tere saya-e-diwar ke bich

kya kahen hum ki gale Dale phiren masti mein

dane subha ke piro rishta-e-zunnar ke bich

rashk-e-KHubi ka isi ke jigar-e-mah mein hai dagh

ye jo ek KHal paDa hai tere ruKHsar ke bich

mil gaya phulon mein is rang se karte hue sair

ki tammul kiye paya use gulzar ke bich

qadr go tum na karo meri mata-e-dil ki

jins lag jawegi ye bhi kisu sarkar ke bich

gard-e-sar-rafta hain ai 'mir' hum us kushte ke

rah gaya yar ki jo ek hi talwar ke bich