hath se tere agar main na-tawan mara gaya

haath se tere agar maiñ nā-tavāñ maarā gayā

sab kaheñge ye ki kyā ik nīm-jāñ maarā gayā

ik nigah se besh kuchh nuqsāñ na aayā us ke tiiñ

aur maiñ be-chāra to ai mehrbāñ maarā gayā

vasl-o-hijrañ ye jo do manzil haiñ rāh-e-ishq kī

dil ġharīb in meñ ḳhudā jaane kahāñ maarā gayā

dil ne sar khīñchā dayār-e-ishq meñ ai bul-havas

vo sarāpā-ārzū āḳhir javāñ maarā gayā

kab niyāz-e-ishq nāz-e-husn se khīñche hai haath

āḳhir āḳhir 'mīr' sar-bar-āstāñ maarā gayā

hath se tere agar main na-tawan mara gaya

sab kahenge ye ki kya ek nim-jaan mara gaya

ek nigah se besh kuchh nuqsan na aaya us ke tin

aur main be-chaara to ai mehrban mara gaya

wasl-o-hijran ye jo do manzil hain rah-e-ishq ki

dil gharib in mein KHuda jaane kahan mara gaya

dil ne sar khincha dayar-e-ishq mein ai bul-hawas

wo sarapa-arzu aaKHir jawan mara gaya

kab niyaz-e-ishq naz-e-husn se khinche hai hath

aaKHir aaKHir 'mir' sar-bar-astan mara gaya