is mauj-KHez dahr mein tu hai habab sa

is mauj-ḳhez dahr meñ tū hai habāb sā

āñkheñ khulīñ tirī to ye aalam hai ḳhvāb sā

burqā uThā ke dekhe hai muñh se kabhū idhar

baare huā hai in dinoñ raf.a-e-hijāb sā

vo dil ki tere hote rahe thā bharā bharā

ab is ko dekhiye to hai ik ghar ḳharāb sā

das roz aage dekhā thā jaisā so ab nahīñ

dil rah gayā hai siine meñ jal kar kabāb sā

is umr meñ ye hosh ki kahne ko narm garm

bigḌā rahe hai sāḳhta mast-e-sharāb sā

hai ye fareb-e-shauq ki jaate haiñ ḳhat chale

vaañ se vagarna kab kā huā hai javāb sā

kyā satr-e-mauj-e-ashk ravānī ke saath hai

mushtāq-e-girya abr hai chashm-e-pur-āb sā

dozaḳh huā hai hijr meñ us ke jahāñ hameñ

soz-e-darūñ se jaan pe hai ik azaab sā

muddat huī ki dil se qarār-o-sukūñ ga.e

rahtā hai ab to aaTh pahar iztirāb sā

mavvāj aab sā hai va-lekin uḌe hai ḳhaak

hai 'mīr' bahr-e-be-tah-e-hastī sarāb sā

is mauj-KHez dahr mein tu hai habab sa

aankhen khulin teri to ye aalam hai KHwab sa

burqa uTha ke dekhe hai munh se kabhu idhar

bare hua hai in dinon rafa-e-hijab sa

wo dil ki tere hote rahe tha bhara bhara

ab is ko dekhiye to hai ek ghar KHarab sa

das roz aage dekha tha jaisa so ab nahin

dil rah gaya hai sine mein jal kar kabab sa

is umr mein ye hosh ki kahne ko narm garm

bigDa rahe hai saKHta mast-e-sharab sa

hai ye fareb-e-shauq ki jate hain KHat chale

wan se wagarna kab ka hua hai jawab sa

kya satr-e-mauj-e-ashk rawani ke sath hai

mushtaq-e-girya abr hai chashm-e-pur-ab sa

dozaKH hua hai hijr mein us ke jahan hamein

soz-e-darun se jaan pe hai ek azab sa

muddat hui ki dil se qarar-o-sukun gae

rahta hai ab to aaTh pahar iztirab sa

mawwaj aab sa hai wa-lekin uDe hai KHak

hai 'mir' bahr-e-be-tah-e-hasti sarab sa