jab se aankhen khuli hain apni dard-o-ranj-o-gham dekhe

jab se āñkheñ khulī haiñ apnī dard-o-ranj-o-ġham dekhe

in hī dīda-e-nam-dīdoñ se kyā kyā ham ne sitam dekhe

sar jaane kī or apne zinhār nigāh na kī ham ne

uTh ke añdhā-dhund aa.e chale hī us zālim ke qadam dekhe

'ālam hai.at-e-majmū’ī se ek 'ajīb muraqqa’ hai

har safhe meñ varaq meñ us ke dekhe to 'ālam dekhe

zaḳhm na hoveñ kyūñkar ġhā.ir chhātī meñ dil-ḳhastoñ kī

tīr-e-nigāh-e-yār jigar par lagte hue paiham dekhe

yaar ke dar par zikr hai kyā hangāma-e-roz-e-mahshar kā

us kūche meñ qayāmat se to 'mīr' bahut ūdham dekhe

jab se aankhen khuli hain apni dard-o-ranj-o-gham dekhe

in hi dida-e-nam-didon se kya kya hum ne sitam dekhe

sar jaane ki or apne zinhaar nigah na ki hum ne

uTh ke andha-dhund aae chale hi us zalim ke qadam dekhe

'alam haiat-e-majmu’i se ek 'ajib muraqqa’ hai

har safhe mein waraq mein us ke dekhe to 'alam dekhe

zaKHm na howen kyunkar ghair chhati mein dil-KHaston ki

tir-e-nigah-e-yar jigar par lagte hue paiham dekhe

yar ke dar par zikr hai kya hangama-e-roz-e-mahshar ka

us kuche mein qayamat se to 'mir' bahut udham dekhe