kab lutf-e-zabani kuchh us ghuncha-dahan ka tha

kab lutf-e-zabānī kuchh us ġhuncha-dahan kā thā

barsoñ mile par ham se sarfa hī suḳhan kā thā

asbāb muhayyā the sab marne hī ke lekin

ab tak na muue ham jo andesha kafan kā thā

bulbul ko muā paayā kal phūloñ kī dūkāñ par

us murġh ke bhī jī meñ kyā shauq chaman kā thā

be-Dol qadam terā paḌtā thā laḌakpan meñ

ronā hameñ avval hī us tere chalan kā thā

murġhān-e-qafas saare tasbīh meñ the gul kī

har-chand ki har ik kā Dhalkā huā mankā thā

sab sat.h hai paanī kā ā.īne kā sā taḳhta

dariyā meñ kahīñ shāyad aks us ke badan kā thā

ḳhūgar nahīñ ham yūñhī kuchh reḳhta kahne se

māshūq jo apnā thā bāshinda dakan kā thā

bhauoñ ta.iiñ tum jis din saj nikle the ik-pecha

us din hī tumheñ dekhe māthā mirā Thankā thā

rah 'mīr' ġharībāna jaatā thā chalā rotā

har-gām gila lab par yārān-e-vatan kā thā

kab lutf-e-zabani kuchh us ghuncha-dahan ka tha

barson mile par hum se sarfa hi suKHan ka tha

asbab muhayya the sab marne hi ke lekin

ab tak na mue hum jo andesha kafan ka tha

bulbul ko mua paya kal phulon ki dukan par

us murgh ke bhi ji mein kya shauq chaman ka tha

be-Dol qadam tera paDta tha laDakpan mein

rona hamein awwal hi us tere chalan ka tha

murghan-e-qafas sare tasbih mein the gul ki

har-chand ki har ek ka Dhalka hua manka tha

sab sath hai pani ka aaine ka sa taKHta

dariya mein kahin shayad aks us ke badan ka tha

KHugar nahin hum yunhi kuchh reKHta kahne se

mashuq jo apna tha bashinda dakan ka tha

bhauon tain tum jis din saj nikle the ik-pecha

us din hi tumhein dekhe matha mera Thanka tha

rah 'mir' gharibana jata tha chala rota

har-gam gila lab par yaran-e-watan ka tha