کل دل آزردہ گلستاں سے گزر ہم نے کیا

کل دل آزردہ گلستاں سے گزر ہم نے کیا

گل لگے کہنے کہو منہ نہ ادھر ہم نے کیا

کر گئی خواب سے بیدار تمہیں صبح کی باؤ

بے دماغ اتنے جو ہو ہم پہ مگر ہم نے کیا

سیدھے تلوار کے منہ پر تری ہم آئے چلے

کیا کریں اس دل خستہ کو سپر ہم نے کیا

نیمچہ ہاتھ میں مستی سے لہو سی آنکھیں

سج تری دیکھ کے اے شوخ حذر ہم نے کیا

پاؤں کے نیچے کی مٹی بھی نہ ہوگی ہم سی

کیا کہیں عمر کو اس طرح بسر ہم نے کیا

کھا گیا ناخن سر تیز جگر دل دونوں

رات کی سینہ خراشی میں ہنر ہم نے کیا

کام ان ہونٹوں سے وہ لے جو کوئی ہم سا ہو

دیکھتے دیکھتے ہی آنکھوں میں گھر ہم نے کیا

جیسے حسرت لیے جاتا ہے جہاں سے کوئی

آہ یوں کوچۂ دلبر سے سفر ہم نے کیا

بارے کل ٹھہر گئے ظالم خونخوار سے ہم

منصفی کیجے تو کچھ کم نہ جگر ہم نے کیا

اس رخ و زلف کی تسبیح ہے یاں اکثر میرؔ

ورد اپنا یہی اب شام و سحر ہم نے کیا