kis fitna-qad ki aisi dhum aane ki paDi hai

kis fitna-qad kī aisī dhuum aane kī paḌī hai

har shāḳh-e-gul chaman meñ bhīchak huī khaḌī hai

vāshud huī na bulbul apnī bahār meñ bhī

kyā jāniye ki jī meñ ye kaisī guljhaḌī hai

nādīdanī dikhāve kyūñkar na ishq ham ko

kis fitna-e-zamāñ se aañkh apnī jā laḌī hai

ve din ga.e ki pahroñ karte na zikr us kā

ab nām-e-yār apne lab par ghaḌī ghaḌī hai

ātish sī phuk rahī hai saare badan meñ mere

dil meñ ajab tarah kī chingārī aa paḌī hai

kyā kuchh hamīñ ko us kī talvār khā ga.ī hai

aisī hī ik jaḌī hai us ne jahāñ jaḌī hai

kyā 'mīr' sar jhukāveñ har kam-baġhal ke aage

nām-e-ḳhudā unhoñ kī izzat bahut baḌī hai

kis fitna-qad ki aisi dhum aane ki paDi hai

har shaKH-e-gul chaman mein bhichak hui khaDi hai

washud hui na bulbul apni bahaar mein bhi

kya jaaniye ki ji mein ye kaisi guljhaDi hai

nadidani dikhawe kyunkar na ishq hum ko

kis fitna-e-zaman se aankh apni ja laDi hai

we din gae ki pahron karte na zikr us ka

ab nam-e-yar apne lab par ghaDi ghaDi hai

aatish si phuk rahi hai sare badan mein mere

dil mein ajab tarah ki chingari aa paDi hai

kya kuchh hamin ko us ki talwar kha gai hai

aisi hi ek jaDi hai us ne jahan jaDi hai

kya 'mir' sar jhukawen har kam-baghal ke aage

nam-e-KHuda unhon ki izzat bahut baDi hai