mabaad kine pe us but ki taba aai ho

mabād kiine pe us but kī tab.a aa.ī ho

phir ek bas hai vahī go udhar ḳhudā.ī ho

madad na itnī bhī kī baḳht-e-nā-muvāfiq ne

ki mudda.ī se use ek din laḌā.ī ho

hanūz tifl hai vo zulm-pesha kyā jaane

lagāve teġh salīqe se jo lagā.ī ho

laboñ se tere thā aage hī la.al surḳh-o-zard

qasam hai maiñ ne agar baat bhī chalā.ī ho

ḳhudā kare ki nasīb apne ho na āzādī

kidhar ke hoje jo be-bāl-o-par rihā.ī ho

maze ko ishq kī zillat ke jāntā hai vahī

kisū kī jin ne kabhū lāt-mukkī khaa.ī ho

us āftāb se to faiz sab ko pahuñche hai

yaqīn hai ki kuchh apnī hī nā-rasā.ī ho

kabhū hai chheḌ kabhū gaalī hai kabhū chashmak

bayān kariye jo ek us kī be-adā.ī ho

dayār-e-husn meñ ġhālib ki ḳhasta-jānoñ ne

davā ke vāste bhī mehr Tuk na paa.ī ho

hazār martaba behtar hai bādshāhī se

agar nasīb tire kūche kī gadā.ī ho

jo koī dam ho to lohū sā pī ke rah jā.ūñ

ġhamoñ kī dil meñ bhalā kab talak samā.ī ho

muġhāñ se raah to ho jaa.e rafta rafta shaiḳh

tirā bhī qasd agar tark-e-pārsā.ī ho

kaheñ to haiñ ki abas 'mīr' ne diyā jī ko

ḳhudā hī jaane ki kyā jī meñ us ke aa.ī ho

mabaad kine pe us but ki taba aai ho

phir ek bas hai wahi go udhar KHudai ho

madad na itni bhi ki baKHt-e-na-muwafiq ne

ki muddai se use ek din laDai ho

hanuz tifl hai wo zulm-pesha kya jaane

lagawe tegh saliqe se jo lagai ho

labon se tere tha aage hi lal surKH-o-zard

qasam hai main ne agar baat bhi chalai ho

KHuda kare ki nasib apne ho na aazadi

kidhar ke hoje jo be-baal-o-par rihai ho

maze ko ishq ki zillat ke jaanta hai wahi

kisu ki jin ne kabhu lat-mukki khai ho

us aaftab se to faiz sab ko pahunche hai

yaqin hai ki kuchh apni hi na-rasai ho

kabhu hai chheD kabhu gali hai kabhu chashmak

bayan kariye jo ek us ki be-adai ho

dayar-e-husn mein ghaalib ki KHasta-jaanon ne

dawa ke waste bhi mehr Tuk na pai ho

hazar martaba behtar hai baadshahi se

agar nasib tere kuche ki gadai ho

jo koi dam ho to lohu sa pi ke rah jaun

ghamon ki dil mein bhala kab talak samai ho

mughan se rah to ho jae rafta rafta shaiKH

tera bhi qasd agar tark-e-parsai ho

kahen to hain ki abas 'mir' ne diya ji ko

KHuda hi jaane ki kya ji mein us ke aai ho