betab ji ko dekha dil ko kabab dekha

betāb jī ko dekhā dil ko kabāb dekhā

jiite rahe the kyoñ ham jo ye azaab dekhā

paudā sitam kā jis ne is baaġh meñ lagāyā

apne kiye kā un ne samra shitāb dekhā

dil kā nahīñ Thikānā bābat jigar kī ġham hai

tere balā-kashoñ kā ham ne hisāb dekhā

ābād jis meñ tujh ko dekhā thā ek muddat

us dil kī mamlikat ko ab ham ḳharāb dekhā

yuuñ ḳhaak meñ milā yaañ us bin ki kuchh na pūchho

is zulm-dīda dil kā ham iztirāb dekhā

vaa.iz zabūn mat kah maiḳhāne ko ki is jā

pairāhan-e-nikoyāñ rehn-e-sharāb dekhā

lete hī naam us kā sote se chauñk uThe ho

hai ḳhair 'mīr' sāhib kuchh tum ne ḳhvāb dekhā

betab ji ko dekha dil ko kabab dekha

jite rahe the kyon hum jo ye azab dekha

pauda sitam ka jis ne is bagh mein lagaya

apne kiye ka un ne samra shitab dekha

dil ka nahin Thikana babat jigar ki gham hai

tere bala-kashon ka hum ne hisab dekha

aabaad jis mein tujh ko dekha tha ek muddat

us dil ki mamlikat ko ab hum KHarab dekha

yun KHak mein mila yan us bin ki kuchh na puchho

is zulm-dida dil ka hum iztirab dekha

waiz zabun mat kah maiKHane ko ki is ja

pairahan-e-nikoyan rehn-e-sharab dekha

lete hi nam us ka sote se chaunk uThe ho

hai KHair 'mir' sahib kuchh tum ne KHwab dekha