hamare aage tera jab kisu ne nam liya

hamāre aage tirā jab kisū ne naam liyā

dil-e-sitam-zada ko ham ne thaam thaam liyā

qasam jo khā.iye to tāla-e-zuleḳhā kī

azīz-e-misr kā bhī sāhab ik ġhulām liyā

ḳharāb rahte the masjid ke aage mai-ḳhāne

nigāh-e-mast ne saaqī kī intiqām liyā

vo kaj-ravish na milā rāste meñ mujh se kabhī

na sīdhī tarah se un ne mirā salām liyā

mazā dikhāveñge be-rahmī kā tirī sayyād

gar iztirāb-e-asīrī ne zer-e-dām liyā

mire salīqe se merī nibhī mohabbat meñ

tamām umr maiñ nākāmiyoñ se kaam liyā

agarche gosha-guzīñ huuñ maiñ shā.iroñ meñ 'mīr'

pa mere shor ne rū-e-zamīñ tamām liyā

hamare aage tera jab kisu ne nam liya

dil-e-sitam-zada ko hum ne tham tham liya

qasam jo khaiye to tala-e-zuleKHa ki

aziz-e-misr ka bhi sahab ek ghulam liya

KHarab rahte the masjid ke aage mai-KHane

nigah-e-mast ne saqi ki intiqam liya

wo kaj-rawish na mila raste mein mujh se kabhi

na sidhi tarah se un ne mera salam liya

maza dikhawenge be-rahmi ka teri sayyaad

gar iztirab-e-asiri ne zer-e-dam liya

mere saliqe se meri nibhi mohabbat mein

tamam umr main nakaamiyon se kaam liya

agarche gosha-guzin hun main shairon mein 'mir'

pa mere shor ne ru-e-zamin tamam liya