aisi gali ek shahr-e-islam nahin rakhta

aisī galī ik shahr-e-islām nahīñ rakhtā

jis kūche meñ vo but sad badnām nahīñ rakhtā

āzār na de apne kānoñ ke ta.iiñ ai gul

āġhāz mire ġham kā anjām nahīñ rakhtā

nākāmī-e-sad-hasrat ḳhush lagtī nahīñ varna

ab jī se guzar jaanā kuchh kaam nahīñ rakhtā

ho ḳhushk to behtar hai vo haath bahārāñ meñ

mānind-e-nay-e-nargis jo jaam nahīñ rakhtā

bin us kī ham-āġhoshī betāb nahīñ ab hai

muddat se baġhal meñ dil ārām nahīñ rakhtā

maiñ dāḌhī tirī vā'iz masjid hī meñ muñDvātā

par kyā karūñ saath apne hajjām nahīñ rakhtā

vo muflis un āñkhoñ se kyūñkar ke basar aave

jo apnī girah meñ ik bādām nahīñ rakhtā

kyā baat karūñ us se mil jaa.e jo vo maiñ to

is nākasī se rū-e-dushnām nahīñ rakhtā

yuuñ to rah-o-rasm us ko is shahr meñ sab se hai

ik 'mīr' hī se ḳhatt-o-paiġhām nahīñ rakhtā

aisi gali ek shahr-e-islam nahin rakhta

jis kuche mein wo but sad badnam nahin rakhta

aazar na de apne kanon ke tain ai gul

aaghaz mere gham ka anjam nahin rakhta

nakaami-e-sad-hasrat KHush lagti nahin warna

ab ji se guzar jaana kuchh kaam nahin rakhta

ho KHushk to behtar hai wo hath bahaaran mein

manind-e-nay-e-nargis jo jam nahin rakhta

bin us ki ham-aghoshi betab nahin ab hai

muddat se baghal mein dil aaram nahin rakhta

main daDhi teri wa'iz masjid hi mein munDwata

par kya karun sath apne hajjam nahin rakhta

wo muflis un aankhon se kyunkar ke basar aawe

jo apni girah mein ek baadam nahin rakhta

kya baat karun us se mil jae jo wo main to

is nakasi se ru-e-dushnam nahin rakhta

yun to rah-o-rasm us ko is shahr mein sab se hai

ek 'mir' hi se KHatt-o-paigham nahin rakhta