wan wo to ghar se apne pi kar sharab nikla

vaañ vo to ghar se apne pī kar sharāb niklā

yaañ sharm se araq meñ Duub āftāb niklā

aayā jo vāqiye meñ darpesh ālam-e-marg

ye jāgnā hamārā dekhā to ḳhvāb niklā

dekhā jo os paḌte gulshan meñ ham to āḳhir

gul kā vo rū-e-ḳhandāñ chashm-e-pur-āb niklā

parde hī meñ chalā jā ḳhurshīd to hai behtar

ik hashr hai jo ghar se vo be-hijāb niklā

kuchh der hī lagī na dil ko to tiir lagte

us said-e-nā-tavāñ kā kyā jī shitāb niklā

har harf-e-ġham ne mere majlis ke ta.iiñ rulāyā

goyā ġhubār dil kā paḌhtā kitāb niklā

rū-e-araq-fishāñ ko bas poñchh garm mat ho

us gul meñ kyā rahegā jis kā gulāb niklā

mutlaq na e'tinā kī ahvāl par hamāre

naame kā naame hī meñ sab pech-o-tāb niklā

shān-e-taġhāful apne nau-ḳhat kī kyā likheñ ham

qāsid muā tab us ke muñh se javāb niklā

kis kī nigah kī gardish thī 'mīr' rū-ba-masjid

mehrāb meñ se zāhid mast-o-ḳharāb niklā

wan wo to ghar se apne pi kar sharab nikla

yan sharm se araq mein Dub aaftab nikla

aaya jo waqiye mein darpesh aalam-e-marg

ye jagna hamara dekha to KHwab nikla

dekha jo os paDte gulshan mein hum to aaKHir

gul ka wo ru-e-KHandan chashm-e-pur-ab nikla

parde hi mein chala ja KHurshid to hai behtar

ek hashr hai jo ghar se wo be-hijab nikla

kuchh der hi lagi na dil ko to tir lagte

us said-e-na-tawan ka kya ji shitab nikla

har harf-e-gham ne mere majlis ke tain rulaya

goya ghubar dil ka paDhta kitab nikla

ru-e-araq-fishan ko bas ponchh garm mat ho

us gul mein kya rahega jis ka gulab nikla

mutlaq na e'tina ki ahwal par hamare

name ka name hi mein sab pech-o-tab nikla

shan-e-taghaful apne nau-KHat ki kya likhen hum

qasid mua tab us ke munh se jawab nikla

kis ki nigah ki gardish thi 'mir' ru-ba-masjid

mehrab mein se zahid mast-o-KHarab nikla