junun ne tamasha banaya hamein

junūñ ne tamāshā banāyā hameñ

rahā dekh apnā parāyā hameñ

sadā ham to kho.e ga.e se rahe

kabhū aap meñ tum ne paayā hameñ

yahī tā-dam-e-marg betāb the

na us bin tanik sabr aaya hameñ

shab āñkhoñ se dariyā sā bahtā rahā

inhīñ ne kināre lagāyā hameñ

hamārā nahīñ tum ko kuchh pās-e-ranj

ye kyā tum ne samjhā hai aaya hameñ

lagī sar se juuñ sham.a pā tak ga.ī

sab is daaġh ne aah khāyā hameñ

jaleñ pesh-o-pas jaise sham.a-o-patang

jalā vo bhī jin ne jalāyā hameñ

azal meñ milā kyā na aalam ke tiiñ

qazā ne yahī dil dilāyā hameñ

rahā tū to aksar alam-nāk 'mīr'

tirā taur kuchh ḳhush na aaya hameñ

junun ne tamasha banaya hamein

raha dekh apna paraya hamein

sada hum to khoe gae se rahe

kabhu aap mein tum ne paya hamein

yahi ta-dam-e-marg betab the

na us bin tanik sabr aaya hamein

shab aankhon se dariya sa bahta raha

inhin ne kinare lagaya hamein

hamara nahin tum ko kuchh pas-e-ranj

ye kya tum ne samjha hai aaya hamein

lagi sar se jun shama pa tak gai

sab is dagh ne aah khaya hamein

jalen pesh-o-pas jaise shama-o-patang

jala wo bhi jin ne jalaya hamein

azal mein mila kya na aalam ke tin

qaza ne yahi dil dilaya hamein

raha tu to aksar alam-nak 'mir'

tera taur kuchh KHush na aaya hamein