dil ki baat kahi nahin jati chupke rahna Thana hai

dil kī baat kahī nahīñ jaatī chupke rahnā Thānā hai

haal agar hai aisā hī to jī se jaanā jaanā hai

us kī nigāh-e-tez hai mere dosh-o-bar par in rozoñ

ya.anī dil pahlū meñ mere tīr-e-sitam kā nishāna hai

dil jo rahe to paañv ko bhī dāman meñ ham khīñch rakheñ

sub.h se le kar sāñjh talak ūdhar hī jaanā aanā hai

surḳh kabhū aañsū haiñ hote zard kabhū hai muñh merā

kyā kyā rang mohabbat ke haiñ ye bhī ek zamāna hai

is naumīdī-e-be-ġhāyat par kis miqdār kuḌhā kariye

do dam jiite rahnā hai to qayāmat tak mar jaanā hai

fursat kam hai yaañ rahne kī baat nahīñ kuchh kahne kī

āñkheñ khol ke kaan jo kholo bazm-e-jahāñ afsāna hai

fā.eda hogā kyā mutarattib nāseh harza-darā.ī se

kis kī nasīhat kaun sune hai āshiq to dīvāna hai

teġh tale hī us kī kyoñ na gardan Daal ke jā baiTheñ

sar to āḳhir-kār hameñ bhī ḳhaak kī or jhukānā hai

āñkhoñ kī ye mardum-dārī dil ko kisū dilbar se hai

tarz-e-nigah tarrārī saarī 'mīr' tumheñ pahchānā hai

dil ki baat kahi nahin jati chupke rahna Thana hai

haal agar hai aisa hi to ji se jaana jaana hai

us ki nigah-e-tez hai mere dosh-o-bar par in rozon

yani dil pahlu mein mere tir-e-sitam ka nishana hai

dil jo rahe to panw ko bhi daman mein hum khinch rakhen

subh se le kar sanjh talak udhar hi jaana aana hai

surKH kabhu aansu hain hote zard kabhu hai munh mera

kya kya rang mohabbat ke hain ye bhi ek zamana hai

is naumidi-e-be-ghayat par kis miqdar kuDha kariye

do dam jite rahna hai to qayamat tak mar jaana hai

fursat kam hai yan rahne ki baat nahin kuchh kahne ki

aankhen khol ke kan jo kholo bazm-e-jahan afsana hai

faeda hoga kya mutarattib naseh harza-darai se

kis ki nasihat kaun sune hai aashiq to diwana hai

tegh tale hi us ki kyon na gardan Dal ke ja baiThen

sar to aaKHir-kar hamein bhi KHak ki or jhukana hai

aankhon ki ye mardum-dari dil ko kisu dilbar se hai

tarz-e-nigah tarrari sari 'mir' tumhein pahchana hai