ta gor ke upar wo gul-andam na aaya

tā gor ke uupar vo gul-andām na aaya

ham ḳhaak ke āsūdoñ ko ārām na aaya

behosh-e-mai-e-ishq huuñ kyā merā bharosā

aaya jo ba-ḳhud sub.h to maiñ shaam na aaya

kis dil se tirā tīr-e-nigah paar na guzrā

kis jaan ko ye marg kā paiġhām na aaya

dekhā na use duur se bhī muntaziroñ ne

vo rashk-e-mah-e-īd lab-e-bām na aaya

sau baar bayābāñ meñ gayā mahmil-e-lailā

majnūñ kī taraf naaqa koī gaam na aaya

ab ke jo tire kūche se jā.ūñgā to suniyo

phir jiite jī is raah vo badnām na aaya

nai ḳhuun ho āñkhoñ se bahā Tuk na huā daaġh

apnā to ye dil 'mīr' kisū kaam na aaya

ta gor ke upar wo gul-andam na aaya

hum KHak ke aasudon ko aaram na aaya

behosh-e-mai-e-ishq hun kya mera bharosa

aaya jo ba-KHud subh to main sham na aaya

kis dil se tera tir-e-nigah par na guzra

kis jaan ko ye marg ka paigham na aaya

dekha na use dur se bhi muntaziron ne

wo rashk-e-mah-e-id lab-e-baam na aaya

sau bar bayaban mein gaya mahmil-e-laila

majnun ki taraf naqa koi gam na aaya

ab ke jo tere kuche se jaunga to suniyo

phir jite ji is rah wo badnam na aaya

nai KHun ho aankhon se baha Tuk na hua dagh

apna to ye dil 'mir' kisu kaam na aaya