uski rahegi garmi-e-bazar kab talak

us kī rahegī garmī-e-bāzār kab talak

vo bechtā rahegā ḳharīdār kab talak

vā'd-o-va'īd-e-hashr qayāmat hai dekhiye

jiite raheñge tālib-e-dīdār kab talak

dil kā jigar kā lohū to ġham ne sukhā diyā

āñkheñ raheñgī dekhiye ḳhūñ-bār kab talak

nisbat bahut gunāhoñ kī kartā hai is taraf

be-jurm ham raheñge gunahgār kab talak

us kī nigāh-e-mast hai aksar sū-e-rabāt

suufī raheñge haal se hushiyār kab talak

dīvār-o-dar baḌe the jahāñ vaañ nishāñ nahīñ

yaañ ḳhānvādoñ ke raheñ āsār kab talak

mehmān koī din kā hai vārafta ishq kā

zāhir hai haal se ki ye bīmār kab talak

tarsā ke mārne meñ azāb-e-shadīd hai

ik khīñch kar na māroge talvār kab talak

sayyād asiir kar ke jise uTh gayā ho 'mīr'

vo daam kī shikan meñ giraftār kab talak

us ki rahegi garmi-e-bazar kab talak

wo bechta rahega KHaridar kab talak

wa'd-o-wa'id-e-hashr qayamat hai dekhiye

jite rahenge talib-e-didar kab talak

dil ka jigar ka lohu to gham ne sukha diya

aankhen rahengi dekhiye KHun-bar kab talak

nisbat bahut gunahon ki karta hai is taraf

be-jurm hum rahenge gunahgar kab talak

us ki nigah-e-mast hai aksar su-e-rabaat

sufi rahenge haal se hushiyar kab talak

diwar-o-dar baDe the jahan wan nishan nahin

yan KHanwadon ke rahen aasar kab talak

mehman koi din ka hai warafta ishq ka

zahir hai haal se ki ye bimar kab talak

tarsa ke marne mein azab-e-shadid hai

ek khinch kar na maroge talwar kab talak

sayyaad asir kar ke jise uTh gaya ho 'mir'

wo dam ki shikan mein giraftar kab talak