halqe mein rasulon ke wo mah-e-madani hai

halqe meñ rasūloñ ke vo māh-e-madanī hai

kyā chāñd kī tanvīr sitāroñ meñ chhanī hai

kah de mire iisā se madīne meñ ye koī

ab jaan pe bīmār-e-mohabbat ke banī hai

mahbūb ko be-dekhe hue lauT rahe haiñ

ushshāq meñ kyā rang-e-uvais-e-qaranī hai

ghar se kahīñ achchhā hai madīne kā musāfir

yaañ sub.h-e-vatan shām-e-ġharīb-ul-vatanī hai

me.arāj meñ hūroñ ne jo dekhā to ye bolīñ

kis nok palak kā ye javān-e-madanī hai

ik umr se jaltā hai magar jal nahīñ chuktā

kis sham.a kā parvāna uvais-e-qaranī hai

ushshāq se pūchhe na ga.e hashr meñ a.amāl

kyā bigḌī huī baat mohabbat se banī hai

yaad ahmad-e-muḳhtār kī hai ka.aba-e-dil meñ

makke meñ ayaañ jalva-e-māh-e-madanī hai

kis shauq se jaate haiñ madīne ke musāfir

mahbūb vatan se kahīñ ye be-vatanī hai

kahtā hai musāfir se ye har naḳhl-e-madīna

ārām zarā le lo yahāñ chhāñv ghanī hai

āġhosh-e-tasavvur meñ bhī aanā nahīñ mumkin

hūroñ se bhī baḌh kar tirī nāzuk-badanī hai

allāh ke mahbūb se hai ishq kā da.avā

bandoñ kā bhī kyā hausla allāh-ġhanī hai

āñkhoñ se Tapaktā hai mirī rang-e-ovaisī

jo laḳht-e-jigar hai vo aqīq-e-yamanī hai

maiñ us ke ġhulāmoñ meñ huuñ jo sab kā hai aaqā

sardār-e-rusul sayyad-e-makkī-madanī hai

aadā ne jahāñ māñgī amaañ ruk ga.ī chal kar

shamshīr-e-husainī meñ bhī ḳhulq-e-hasanī hai

har dil meñ hai mahbūb-e-ilāhī kī tajallī

har aa.ine meñ aks-e-jamāl-e-madanī hai

maqtal hai chaman na.ash pe hūroñ kā hai majma.a

kyā rang meñ Duubī mirī ḳhūnīñ kafanī hai

pahuñchī haiñ kahāñ aaheñ uvais-e-qaranī kī

bāġhoñ meñ madīne ke havā-e-yamanī hai

kuchh mad.h paḌhūñ rauza-e-pur-nūr pe chal kar

ye baat 'amīr' ab to mire dil meñ Thanī hai

halqe mein rasulon ke wo mah-e-madani hai

kya chand ki tanwir sitaron mein chhani hai

kah de mere isa se madine mein ye koi

ab jaan pe bimar-e-mohabbat ke bani hai

mahbub ko be-dekhe hue lauT rahe hain

ushshaq mein kya rang-e-uwais-e-qarani hai

ghar se kahin achchha hai madine ka musafir

yan subh-e-watan sham-e-gharib-ul-watani hai

mearaj mein huron ne jo dekha to ye bolin

kis nok palak ka ye jawan-e-madani hai

ek umr se jalta hai magar jal nahin chukta

kis shama ka parwana uwais-e-qarani hai

ushshaq se puchhe na gae hashr mein aamal

kya bigDi hui baat mohabbat se bani hai

yaad ahmad-e-muKHtar ki hai kaba-e-dil mein

makke mein ayan jalwa-e-mah-e-madani hai

kis shauq se jate hain madine ke musafir

mahbub watan se kahin ye be-watani hai

kahta hai musafir se ye har naKHl-e-madina

aaram zara le lo yahan chhanw ghani hai

aaghosh-e-tasawwur mein bhi aana nahin mumkin

huron se bhi baDh kar teri nazuk-badani hai

allah ke mahbub se hai ishq ka dawa

bandon ka bhi kya hausla allah-ghani hai

aankhon se Tapakta hai meri rang-e-owaisi

jo laKHt-e-jigar hai wo aqiq-e-yamani hai

main us ke ghulamon mein hun jo sab ka hai aaqa

sardar-e-rusul sayyad-e-makki-madani hai

aada ne jahan mangi aman ruk gai chal kar

shamshir-e-husaini mein bhi KHulq-e-hasani hai

har dil mein hai mahbub-e-ilahi ki tajalli

har aaine mein aks-e-jamal-e-madani hai

maqtal hai chaman nash pe huron ka hai majma

kya rang mein Dubi meri KHunin kafani hai

pahunchi hain kahan aahen uwais-e-qarani ki

baghon mein madine ke hawa-e-yamani hai

kuchh madh paDhun rauza-e-pur-nur pe chal kar

ye baat 'amir' ab to mere dil mein Thani hai