siyasi maslahat

hai yahī dastūr duniyā aur yahī dekhā gayā

phuul se ḳhushbū nikalte hī use pheñkā gayā

bāġh-e-hindostān jin jin ke ḳhuun se sīñchā gayā

daar nā-qadrī pe bil-āḳhir unheñ khīñchā gayā

zindagī meñ mil ga.e kitnoñ ko sarkārī ḳhitāb

muft meñ in ko ḳharīdā muft meñ bechā gayā

marne vāloñ ko bhī har e.azāz parliament meñ

ehtimāman vārisoñ ke haath meñ sauñpā gayā

the raqam jin meñ jihād-o-jañg-e-āzādī ke baab

tāq-e-nisyāñ meñ unhī aurāq ko pheñkā gayā

hind kī tārīḳh kā baab daraḳhshāñ pūchhiye

kyuuñ siyāsī maslahat kī aag meñ jhoñkā gayā

mulk meñ firqa-parastoñ kī huā chal hī ga.ī

na kisī ne sarzanish kī na unheñ Tokā gayā

tañg-nazarī buġhz aur nafrat-bhare tirshūl ko

piiTh meñ insāniyat kī is tarah ghoñpā gayā

hazrat-e-'āzād' ko e.azāz bhārat-ratn kā

'ḳhvāh-maḳhvāh' un ke pate par Daak se bhejā gayā

hai yahi dastur duniya aur yahi dekha gaya

phul se KHushbu nikalte hi use phenka gaya

bagh-e-hindostan jin jin ke KHun se sincha gaya

dar na-qadri pe bil-aKHir unhen khincha gaya

zindagi mein mil gae kitnon ko sarkari KHitab

muft mein in ko KHarida muft mein becha gaya

marne walon ko bhi har eazaz parliament mein

ehtimaman warison ke hath mein saunpa gaya

the raqam jin mein jihad-o-jang-e-azadi ke bab

taq-e-nisyan mein unhi auraq ko phenka gaya

hind ki tariKH ka bab daraKHshan puchhiye

kyun siyasi maslahat ki aag mein jhonka gaya

mulk mein firqa-paraston ki hua chal hi gai

na kisi ne sarzanish ki na unhen Toka gaya

tang-nazari bughz aur nafrat-bhare tirshul ko

piTh mein insaniyat ki is tarah ghonpa gaya

hazrat-e-'azad' ko eazaz bhaarat-ratn ka

'KHwah-maKHwah' un ke pate par Dak se bheja gaya