bhaunre ki be-qarari

na vo ketkī kī phaban rahī

na vo motiyā kī adā rahī

na vo nastaran na saman rahī

na vo gul rahe na fazā rahī

na guloñ ke ab haiñ vo qahqahe

na vo bulbuloñ ke haiñ chahchahe

na ġhazal-sarā vo koī rahe

na vo qumriyoñ kī sadā rahī

na vo sarv hai na vo āb-e-jū

na vo ham-safīr haiñ ḳhush-gulū

na banafsha hai na vo nāz-e-bū

na vo ja.afrī na jafā rahī

na vo sub.h kī haiñ tajalliyāñ

na shafaq kī aah vo jhalkiyāñ

na vo uudī uudī haiñ badliyāñ

na vo bhīnī bhīnī havā rahī

na umañgeñ haiñ vo shabāb kī

na vo pattiyāñ haiñ gulāb kī

na havā meñ bū hai sharāb kī

mujhe mast thī jo binā rahī

vo kañval ġhazab ke the dil-rubā

jahāñ uḌte the mire ham-navā

magar ab na un kī hai vo adā

na vo bū rahī na safā rahī

lab-e-ābjū thī fazā ġhazab

vo bahār kī thī havā ajab

mire kunj meñ mujhe roz-o-shab

mai-e-be-ḳhudī thī pilā rahī

vo ġhazab kī kū-kū vo zamzama

vo surīlī dard-bharī sadā

sar-e-shām sarv pe fāḳhta

mujhe loriyāñ thī sunā rahī

haiñ kañval kī ḳhushk jo pattiyāñ

mirī ḳhvāb-gah thī kabhī yahāñ

yahīñ shab ko de de ke thapkiyāñ

thī nasīm mujh ko sulā rahī

na guloñ meñ bū-e-vafā rahī

na vo dil-rubā hī adā rahī

na chaman rahā na fazā rahī

na vo din rahe na havā rahī

na ravish hai ab vo sip.har kī

na guloñ meñ bū hai vo mahr kī

ki havā hai gulshan-e-dahr kī

mujhe sabz-bāġh dikhā rahī

na wo ketki ki phaban rahi

na wo motiya ki ada rahi

na wo nastaran na saman rahi

na wo gul rahe na faza rahi

na gulon ke ab hain wo qahqahe

na wo bulbulon ke hain chahchahe

na ghazal-sara wo koi rahe

na wo qumriyon ki sada rahi

na wo sarw hai na wo aab-e-ju

na wo ham-safir hain KHush-gulu

na banafsha hai na wo naz-e-bu

na wo jafri na jafa rahi

na wo subh ki hain tajalliyan

na shafaq ki aah wo jhalkiyan

na wo udi udi hain badliyan

na wo bhini bhini hawa rahi

na umangen hain wo shabab ki

na wo pattiyan hain gulab ki

na hawa mein bu hai sharab ki

mujhe mast thi jo bina rahi

wo kanwal ghazab ke the dil-ruba

jahan uDte the mere ham-nawa

magar ab na un ki hai wo ada

na wo bu rahi na safa rahi

lab-e-abju thi faza ghazab

wo bahaar ki thi hawa ajab

mere kunj mein mujhe roz-o-shab

mai-e-be-KHudi thi pila rahi

wo ghazab ki ku-ku wo zamzama

wo surili dard-bhari sada

sar-e-sham sarw pe faKHta

mujhe loriyan thi suna rahi

hain kanwal ki KHushk jo pattiyan

meri KHwab-gah thi kabhi yahan

yahin shab ko de de ke thapkiyan

thi nasim mujh ko sula rahi

na gulon mein bu-e-wafa rahi

na wo dil-ruba hi ada rahi

na chaman raha na faza rahi

na wo din rahe na hawa rahi

na rawish hai ab wo siphar ki

na gulon mein bu hai wo mahr ki

ki hawa hai gulshan-e-dahr ki

mujhe sabz-bagh dikha rahi