holi

MORE BYNazeer Akbarabadi

    miyāñ ham se na rakh kuchh ġhubār holī meñ

    ki rūThe milte haiñ aapas meñ yaar holī meñ

    machī hai rañg kaisī bahār holī meñ

    huā hai zor-e-chaman āshkār holī meñ

    ajab ye hind dekhī bahār holī meñ

    ab is mahīne meñ pahuñchī hai yaañ talak ye chaal

    falak jaama pahan surḳhī-e-shafaq se laal

    banā ke chāñd ke sūraj ke āsmāñ par thaal

    farishte kheleñ haiñ holī binā abīr-o-gulāl

    to aadmī bhalā kyā shumār holī meñ

    sunā ke holī jo zohra bajātī hai tambūr

    to us ke raag se bārah burūj haiñ māmūr

    chhūoñ sitāroñ ke uupar paḌā hai rañg nuur

    sabhoñ ke sar pe ye har dam pukārtī hai huur

    jo ghir ke abr kabhī is maze meñ aatā hai

    to bādaloñ meñ vo kyā kyā rañg laatā hai

    ḳhushī se ra.ad bhī Dholak gat lagātā hai

    havā ko holiyāñ ke kyā nachātā hai

    tamām rañg se pur hai bahār holī meñ

    chaman meñ dekho to din raat holī rahtī hai

    sharāb-e-nāb gulshan meñ nahr bahtī hai

    nasīm pyaar se ġhunche haath gahtī hai

    to bāġhbān se bulbul khaḌī ye kahtī hai

    na chheḌ mujh ko ai bad-shi.ār holī meñ

    guloñ ne pahne haiñ kyā kyā joḌe rañg-ba-rañg

    ki jaise laḌke ye māshūq pahante haiñ tañg

    havā se pattoñ ke bajte haiñ taal aur mirdañg

    tamām baaġh meñ kheleñ haiñ holī gul ke sañg

    ajab tarah machī hai bahār holī meñ

    amiir jitne haiñ sab apne ghar meñ haiñ ḳhush-hāl

    qabā.eñ pahne hue tañg tañg gul misāl

    banā ke gahrī tarah hauz mil ke sab filhāl

    machā.e holiyāñ aapas meñ le abīr-o-gulāl

    bane haiñ rañg se rañgīñ nigār holī meñ

    ye sair holī ham ne to biruj meñ dekhī

    kahīñ na hovegī is lutf miyāñ holī

    koī to Duubā hai dāman se le ke cholī

    koī to murlī bajātā hai kah kanhaiyā

    hai dhūm-dhām pe be-iḳhtiyār holī meñ

    gharoñ se sāñvarī aur goriyāñ nikal chaliyāñ

    kusumbī oḌhnī aur mast kurtī uchhalyyāñ

    jidhar ko dekheñ udhar mach rahī haiñ rañg-raliyāñ

    tamām brij pariyoñ se bhar rahīñ galiyāñ

    mazā hai sair hai dar har kanār holī meñ

    jo kuchh kahānī hai ablā bahut piyā maarī

    chalī hai apne piyā paas le ke pichkārī

    gulāl dekh ke phir chhātī khol saarī

    piyā chhātī se lagtī vo chaav maarī

    na taab dil ko rahī ne qarār holī meñ

    jo koī siyānī hai in meñ to koī hai nā-kunad

    vo shor-bor thī sab rañg se nipaT yak chand

    koī dilātī hai sāthin ko yaar key saugand

    ki ab to jāma-o-añgiyā ke Tole haiñ sab band

    phir aa ke kheleñge ho kar do-chār holī meñ

    'nazīr' holī mausam jo jag meñ aatā hai

    vo aisā kaun hai holī nahīñ manātā hai

    koī to rañg chhiḌaktā hai koī gaatā hai

    jo ḳhālī rahtā hai vo dekhne ko jaatā hai

    jo aish chāho so miltā hai yaar holī meñ

    miyan tu hum se na rakh kuchh ghubar holi mein

    ki ruThe milte hain aapas mein yar holi mein

    machi hai rang ki kaisi bahaar holi mein

    hua hai zor-e-chaman aashkar holi mein

    ajab ye hind ki dekhi bahaar holi mein

    ab is mahine mein pahunchi hai yan talak ye chaal

    falak ka jama pahan surKHi-e-shafaq se lal

    bana ke chand ke suraj ke aasman par thaal

    farishte khelen hain holi bina abir-o-gulal

    to aadmi ka bhala kya shumar holi mein

    suna ke holi jo zohra bajati hai tambur

    to us ke rag se barah buruj hain mamur

    chhuon sitaron ke upar paDa hai rang ka nur

    sabhon ke sar pe ye har dam pukarti hai hur

    jo ghir ke abr kabhi is maze mein aata hai

    to baadalon mein wo kya kya hi rang lata hai

    KHushi se rad bhi Dholak ki gat lagata hai

    hawa ko holiyan ga ga ke kya nachata hai

    tamam rang se pur hai bahaar holi mein

    chaman mein dekho to din raat holi rahti hai

    sharab-e-nab ki gulshan mein nahr bahti hai

    nasim pyar se ghunche ka hath gahti hai

    to baghban se bulbul khaDi ye kahti hai

    na chheD mujh ko tu ai bad-shiar holi mein

    gulon ne pahne hain kya kya hi joDe rang-ba-rang

    ki jaise laDke ye mashuq pahante hain tang

    hawa se patton ke bajte hain tal aur mirdang

    tamam bagh mein khelen hain holi gul ke sang

    ajab tarah ki machi hai bahaar holi mein

    amir jitne hain sab apne ghar mein hain KHush-haal

    qabaen pahne hue tang tang gul ki misal

    bana ke gahri tarah hauz mil ke sab filhaal

    machae holiyan aapas mein le abir-o-gulal

    bane hain rang se rangin nigar holi mein

    ye sair holi ki hum ne to biruj mein dekhi

    kahin na howegi is lutf ki miyan holi

    koi to Duba hai daman se le ke ta choli

    koi to murli bajata hai kah kanhaiya ji

    hai dhum-dham pe be-iKHtiyar holi mein

    gharon se sanwari aur goriyan nikal chaliyan

    kusumbi oDhni aur mast kurti uchhalyyan

    jidhar ko dekhen udhar mach rahi hain rang-raliyan

    tamam brij ki pariyon se bhar rahin galiyan

    maza hai sair hai dar har kanar holi mein

    jo kuchh kahani hai abla bahut piya mari

    chali hai apne piya pas le ke pichkari

    gulal dekh ke phir chhati khol di sari

    piya ki chhati se lagti wo chaw ki mari

    na tab dil ko rahi ne qarar holi mein

    jo koi siyani hai in mein to koi hai na-kunad

    wo shor-bor thi sab rang se nipaT yak chand

    koi dilati hai sathin ko yar key saugand

    ki ab to jama-o-angiya ke Tole hain sab band

    phir aa ke khelenge ho kar do-chaar holi mein

    'nazir' holi ka mausam jo jag mein aata hai

    wo aisa kaun hai holi nahin manata hai

    koi to rang chhiDakta hai koi gata hai

    jo KHali rahta hai wo dekhne ko jata hai

    jo aish chaho so milta hai yar holi mein

    0
    COMMENTS
    VIEW COMMENTS

    Additional information available

    Click on the INTERESTING button to view additional information associated with this sher.

    OKAY

    About this sher

    Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.

    Close

    rare Unpublished content

    This ghazal contains ashaar not published in the public domain. These are marked by a red line on the left.

    OKAY