aage baDhne wale

aage baḌhne vaale

badan ko kapḌoñ par oḌhte

aur chhuriyāñ tez kar ke nikalte haiñ

bhiiḌ ko chiir kar rāsta banāte

nāḳhunoñ se noch lete haiñ

libās aur izzateñ-

surḳh mirchoñ se har aañkh ko andhā kar dete haiñ

aur baḌh jaate haiñ

ra.ūnat-bharī muskurāhaT ke saath

chīḳhte aur chup karā dete haiñ

sar-e-ām raqs karte haiñ

aur gāḌiyāñ Takrā jaatī haiñ

laḌke laḌ paḌte

mard, patlūneñ kas lete

aur būḌhe, tambākū meñ

guḌ kī miqdār baḌhā dete haiñ

koī mez un ke sāmne jamā nahīñ rah saktā

aur koī mahfil

un kā dāḳhila rok nahīñ saktī

vo Thokar se darvāza kholte haiñ

aur har kursī un ke liye ḳhālī ho jaatī hai

un ke dabdabe se

dīvāroñ ke palastar ukhaḌ jaatā hai

kāġhaz, shor karnā bhuul jaate haiñ

aur mausam, irāda tabdīl kar lete haiñ

aage baḌhne vāloñ se panāh māñgte haiñ

un ke saath

Darte haiñ

zamīn par jhuk kar chalne vaale

bojhal ḳhāmoshī se unheñ dekhte

aur guzar jaate haiñ

aage baḌhne vaale nahīñ jānte

ki aage baḌhā jā hī nahīñ saktā

phir bhī vo baḌhte haiñ

pahuñch kar dam lete haiñ

be-hayā.ī kī shiddat

āñkhoñ meñ

motiyā utarne kī raftār tez kar detī hai

har tane kī chhāl

badan par an-miT ḳharāsheñ chhoḌ jaatī hai

phiTkirī aur vezlīn se chiknāyā huā maas

haDDiyoñ se hamesha juḌā nahīñ rah saktā

har badan aur har kursī kī

ek umr huā kartī hai

aur phir ham unheñ dekh sakte haiñ

ek din

lipTe hue libās meñ

ḳhalā ko ghūrte hue

kisī nīm-tārīk nasheb meñ

par-kaTe parinde kī tarah

miTTī par loTte hue

aage baḌhne kī paiham koshish meñ

aage baDhne wale

badan ko kapDon par oDhte

aur chhuriyan tez kar ke nikalte hain

bhiD ko chir kar rasta banate

naKHunon se noch lete hain

libas aur izzaten-

surKH mirchon se har aankh ko andha kar dete hain

aur baDh jate hain

raunat-bhari muskurahaT ke sath

chiKHte aur chup kara dete hain

sar-e-am raqs karte hain

aur gaDiyan Takra jati hain

laDke laD paDte

mard, patlunen kas lete

aur buDhe, tambaku mein

guD ki miqdar baDha dete hain

koi mez un ke samne jama nahin rah sakta

aur koi mahfil

un ka daKHila rok nahin sakti

wo Thokar se darwaza kholte hain

aur har kursi un ke liye KHali ho jati hai

un ke dabdabe se

diwaron ke palastar ukhaD jata hai

kaghaz, shor karna bhul jate hain

aur mausam, irada tabdil kar lete hain

aage baDhne walon se panah mangte hain

un ke sath

Darte hain

zamin par jhuk kar chalne wale

bojhal KHamoshi se unhen dekhte

aur guzar jate hain

aage baDhne wale nahin jaante

ki aage baDha ja hi nahin sakta

phir bhi wo baDhte hain

pahunch kar dam lete hain

be-hayai ki shiddat

aankhon mein

motiya utarne ki raftar tez kar deti hai

har tane ki chhaal

badan par an-miT KHarashen chhoD jati hai

phiTkiri aur wezlin se chiknaya hua mas

haDDiyon se hamesha juDa nahin rah sakta

har badan aur har kursi ki

ek umr hua karti hai

aur phir hum unhen dekh sakte hain

ek din

lipTe hue libas mein

KHala ko ghurte hue

kisi nim-tarik nasheb mein

par-kaTe parinde ki tarah

miTTi par loTte hue

aage baDhne ki paiham koshish mein