aaindagan ki udasi mein

jab duniyā mere dukh baTāne aa.ī

mere saare dukh churā liye ga.e the

bharī bahār meñ mere āñsuoñ ke biij jalā.e ga.e haiñ

aaj der ba.ad na.ī mohabbat ko mansūḳh kar ke

pahlī tanhā.ī se lipaT kar sonā achchhā lagā hai

ā.indagāñ kī udāsī lapeT kar

ek purānī mohabbat kā pursā vasūl karte hue bhī

dil nahīñ bharā

jazboñ kī katar-biyūñt aur ḳhālī lafzoñ meñ dukhoñ ke paivand lagāte

thak gayā huuñ

isī udheḌ-bun meñ

ḳhud ko saiñt saiñt kar rakhte hue

apne pairahan meñ

ek ḳhvāb tak sustāne kī fursat nahīñ

so na.e dukh kamāne kī ujlat meñ

tumhārā svāgat hai dost!!!

jab duniya mere dukh baTane aai

mere sare dukh chura liye gae the

bhari bahaar mein mere aansuon ke bij jalae gae hain

aaj der baad nai mohabbat ko mansuKH kar ke

pahli tanhai se lipaT kar sona achchha laga hai

aaindagan ki udasi lapeT kar

ek purani mohabbat ka pursa wasul karte hue bhi

dil nahin bhara

jazbon ki katar-biyunt aur KHali lafzon mein dukhon ke paiwand lagate

thak gaya hun

isi udheD-bun mein

KHud ko saint saint kar rakhte hue

apne pairahan mein

ek KHwab tak sustane ki fursat nahin

so nae dukh kamane ki ujlat mein

tumhaara swagat hai dost!!!