aaKHiri din se pahle

bahut din rah liyā kū-e-nadāmat meñ

hazīmat ke bahut se vaar ham ne sah liye

tirā ye shahr shahr-e-jāñ nahīñ hai

tire is shahr meñ ab aur kyā rahnā

hamāre ḳhvāb

tere ḳhār-o-ḳhas meñ the

hamāre lafz

terī pesh-o-pas meñ the

ki ham har saañs

terī dastaras meñ the

tire ujle dinoñ se

ham ko kyā hissa milegā

gadā ke haath meñ

TuuTā huā kaasa rahegā

hamesha ke liye shāyad

yahī qissa rahegā

ab is dhoke meñ kyā rahnā

bahut din rah liyā kū-e-nadāmat meñ

bahut din rah liya ku-e-nadamat mein

hazimat ke bahut se war hum ne sah liye

tera ye shahr shahr-e-jaan nahin hai

tere is shahr mein ab aur kya rahna

hamare KHwab

tere KHar-o-KHas mein the

hamare lafz

teri pesh-o-pas mein the

ki hum har sans

teri dastaras mein the

tere ujle dinon se

hum ko kya hissa milega

gada ke hath mein

TuTa hua kasa rahega

hamesha ke liye shayad

yahi qissa rahega

ab is dhoke mein kya rahna

bahut din rah liya ku-e-nadamat mein