aaKHri sadi ke moD par

na jaane zindagī kahāñ Thahar ga.ī

ye fasl-e-intizār bhī guzar ga.ī

khulā thā ik darīcha-e-falak-numā

magar havā kā rāsta badal gayā

tamām āsmāñ huā dhuāñ-dhuāñ

zamīñ kā ek ek ḳhvāb jal gayā

khulī huī fazā meñ raakh bhar ga.ī

rafāqatoñ kā tarjumāñ thā jo lahū

vo is tamāshā-gar sadī meñ bah gayā

vo dard-e-mushtarak jo raushnī bane

pighal ke vaqt kī nadī meñ bah gayā

nadī badan kī tah talak utar ga.ī

daraḳht apne phal ko ḳhud hī khā ga.e

zamīñ kī god meñ girā na koī bhī

sahar ke dast-e-nāz be-hinā rahe

duā kī aañkh saarī raat roī bhī

na jaane vo havā-e-shab kidhar ga.ī

havā-e-sard kah rahī hai der se

charāġh-e-jāñ bujhā ke so bhī jā.iye

safar meñ kaun pūchhtā hai hāl-e-dil

udāsiyoñ ke biich kho bhī jā.iye

nigāh meñ jo sub.h thī vo mar ga.ī

manziloñ ke ḳhvāb kā qusūr kyā

pusht kī taraf jo qāfila chale

jo rahravān-e-tez-pā bhaTak ga.e

to ham bhī nā-murādiyāñ uThā chale

zamīn apne zalzaloñ se Dar ga.ī

na jaane zindagi kahan Thahar gai

ye fasl-e-intizar bhi guzar gai

khula tha ek daricha-e-falak-numa

magar hawa ka rasta badal gaya

tamam aasman hua dhuan-dhuan

zamin ka ek ek KHwab jal gaya

khuli hui faza mein rakh bhar gai

rafaqaton ka tarjuman tha jo lahu

wo is tamasha-gar sadi mein bah gaya

wo dard-e-mushtarak jo raushni bane

pighal ke waqt ki nadi mein bah gaya

nadi badan ki tah talak utar gai

daraKHt apne phal ko KHud hi kha gae

zamin ki god mein gira na koi bhi

sahar ke dast-e-naz be-hina rahe

dua ki aankh sari raat roi bhi

na jaane wo hawa-e-shab kidhar gai

hawa-e-sard kah rahi hai der se

charagh-e-jaan bujha ke so bhi jaiye

safar mein kaun puchhta hai haal-e-dil

udasiyon ke bich kho bhi jaiye

nigah mein jo subh thi wo mar gai

manzilon ke KHwab ka qusur kya

pusht ki taraf jo qafila chale

jo rahrawan-e-tez-pa bhaTak gae

to hum bhi na-muradiyan uTha chale

zamin apne zalzalon se Dar gai