aansu

suno, suno, āñsuoñ kī āvāz ruuh ko apne dukhte

hāthoñ se chhū rahī hai

ḳhizāñ-zada ḳhushk patiyāñ haiñ

jo sat.h-e-āb-e-ravāñ pe ruk ruk ke gir rahī haiñ

vo sat.h-e-āb ā.īna hai jis meñ

guzishta lamhoñ ke malgaje naqsh ubhar rahe haiñ

in ā.īna-rañg āñsuoñ meñ

har aarzū har ḳhayāl har yaad ek tasvīr-e-be-kasī hai

shafaq ke bujhte alaao meñ raakh kī taheñ raakh meñ sharāre

ye kis ke aañsū haiñ kaun chup-chāp ro rahā hai

udaas shab kī siyāh āñkhoñ meñ DabDabāte hue

sitāroñ se maiñ ne pūchhā

magar ta.ajjub-zada mujhe dekhte rahe vo

havāoñ kī siskiyoñ se pūchhā

vo apnā dāman sameT kar mere paas se kapkapā ke chal diiñ

magar ye aañsū lahakte lamhoñ ke aa.ine haiñ

in āñsuoñ meñ

har aarzū har ḳhayāl har yaad phir se ābād ho ga.ī hai

damakte aañsū ye qumqume jin se shab kī tārīkiyāñ ujāle

in ā.īna-rañg āñsuoñ se nazar milāo

mujhe na dekho

ki merī āñkhoñ meñ to koī ā.īna nahīñ hai

suno suno āñsuoñ kī āvāz saare aalam pe chhā rahī hai

magar maiñ kab se taras rahā huuñ

ki merī pathrā.ī ḳhushk āñkhoñ se bhī kuchh aañsū

ubhartī lahroñ kī tarah ubhreñ

aur un kī hiddat meñ Dhal ke bah jaa.e mere siine

kā dard-e-sañgīñ

suno, suno, aansuon ki aawaz ruh ko apne dukhte

hathon se chhu rahi hai

KHizan-zada KHushk patiyan hain

jo sath-e-ab-e-rawan pe ruk ruk ke gir rahi hain

wo sath-e-ab aaina hai jis mein

guzishta lamhon ke malgaje naqsh ubhar rahe hain

in aaina-rang aansuon mein

har aarzu har KHayal har yaad ek taswir-e-be-kasi hai

shafaq ke bujhte alao mein rakh ki tahen rakh mein sharare

ye kis ke aansu hain kaun chup-chap ro raha hai

udas shab ki siyah aankhon mein DabDabaate hue

sitaron se main ne puchha

magar tajjub-zada mujhe dekhte rahe wo

hawaon ki siskiyon se puchha

wo apna daman sameT kar mere pas se kapkapa ke chal din

magar ye aansu lahakte lamhon ke aaine hain

in aansuon mein

har aarzu har KHayal har yaad phir se aabaad ho gai hai

damakte aansu ye qumqume jin se shab ki tarikiyan ujale

in aaina-rang aansuon se nazar milao

mujhe na dekho

ki meri aankhon mein to koi aaina nahin hai

suno suno aansuon ki aawaz sare aalam pe chha rahi hai

magar main kab se taras raha hun

ki meri pathrai KHushk aankhon se bhi kuchh aansu

ubharti lahron ki tarah ubhren

aur un ki hiddat mein Dhal ke bah jae mere sine

ka dard-e-sangin