abhi bhuk se ek chuha mara hai

muravvat hai dil meñ na pās-e-vafā hai

na tirchhī haiñ nazreñ na bāñkī adā hai

javānī musībat buḌhāpā balā hai

laḌakpan ko dekho to murjhā gayā hai

girānī se duniyā ko bāvar huā hai

ki apne zamāne kā hāfiz ḳhudā hai

na maTke meñ aaTā na Dibboñ meñ dāleñ

batā.e koī log kis ko pakā leñ

ye farmān hākim hai kis tarah Tāleñ

kahā hai ġharīboñ se añgūr khā leñ

patīlī hai ḳhālī vahāñ kyā dharā hai

abhī bhuuk se ek chuhā marā hai

namak par musībat masāloñ pe aafat

qayāmat hai īñdhan pe dāloñ pe aafat

baḌā gosht mahñgā piyāloñ pe aafat

girānī huī jiine vāloñ pe aafat

bachā hai to aafat se baniyā bachā hai

sar-e-ām sab kī girah kāTtā hai

sunātā huuñ kapḌoñ kī uryāñ kahānī

miyāñ bhaav par aa ga.ī hai javānī

dukāñ meñ ga.e to hue āñ-jahānī

guzarne lagā hai mire sar se paanī

ki khaddar bhī mahñgā bahut ho chukā hai

rebate us pe das fīsadī rah gayā hai

na kapḌā na roTī na loTā na dhotī

pareshāñ hai potā bilaktī hai potī

ki qīmat meñ gandum kā daana hai motī

ye mumkin nahīñ thā vilādat na hotī

har ik samt koh-e-nidā chīḳhtā hai

jo paidā huā mubtalā-e-balā hai

zamāna pareshāñ hai mahñgā.iyāñ haiñ

pareshāñ hasīnoñ kī añgḌā.iyāñ haiñ

na sehre na mehñdī na shahnā.iyāñ haiñ

dukāñ-dār lekin baḌe kā.iyāñ haiñ

jo ration meñ paayā mayassar huā hai

na jaane is aaTe meñ kyā kyā milā hai

murawwat hai dil mein na pas-e-wafa hai

na tirchhi hain nazren na banki ada hai

jawani musibat buDhapa bala hai

laDakpan ko dekho to murjha gaya hai

girani se duniya ko bawar hua hai

ki apne zamane ka hafiz KHuda hai

na maTke mein aaTa na Dibbon mein dalen

batae koi log kis ko paka len

ye farman hakim hai kis tarah Talen

kaha hai gharibon se angur kha len

patili hai KHali wahan kya dhara hai

abhi bhuk se ek chuha mara hai

namak par musibat masalon pe aafat

qayamat hai indhan pe dalon pe aafat

baDa gosht mahnga piyalon pe aafat

girani hui jine walon pe aafat

bacha hai to aafat se baniya bacha hai

sar-e-am sab ki girah kaTta hai

sunata hun kapDon ki uryan kahani

miyan bhaw par aa gai hai jawani

dukan mein gae to hue aan-jahani

guzarne laga hai mere sar se pani

ki khaddar bhi mahnga bahut ho chuka hai

rebate us pe das fisadi rah gaya hai

na kapDa na roTi na loTa na dhoti

pareshan hai pota bilakti hai poti

ki qimat mein gandum ka dana hai moti

ye mumkin nahin tha wiladat na hoti

har ek samt koh-e-nida chiKHta hai

jo paida hua mubtala-e-bala hai

zamana pareshan hai mahngaiyan hain

pareshan hasinon ki angDaiyan hain

na sehre na mehndi na shahnaiyan hain

dukan-dar lekin baDe kaiyan hain

jo ration mein paya mayassar hua hai

na jaane is aaTe mein kya kya mila hai