abu-lahab ki shadi

shab-e-zafāf-e-abū-lahab thī magar ḳhudāyā vo kaisī shab thī

abū-lahab kī dulhan jab aa.ī to sar pe īñdhan gale meñ

sāñpoñ ke haar laa.ī na us ko mashshātgī se matlab

na maañg ġhāza na rañg roġhan gale meñ sāñpoñ

ke haar us ke to sar pe īñdhan

ḳhudāyā kaisī shab-e-zafāf-e-abū-lahab thī

ye dekhte hī hujūm biphrā bhaḌak uThe yuuñ ġhazab

ki shole ke jaise nañge badan pe jābir ke tāziyāne

javān laḌkoñ kī tāliyāñ thī na sehan meñ shoḳh

laḌkiyoñ ke thirakte paañv thirak rahe the

na naġhma baaqī na shādyāne

abū-lahab ne ye rañg dekhā lagām thāmī lagā.ī

mahmez abū-lahab kī ḳhabar na aa.ī

abū-lahab kī ḳhabar jo aa.ī to sāl-hā-sāl kā zamāna

ġhubār ban kar bikhar chukā thā

abū-lahab ajnabī zamīnoñ ke laal o gauhar sameT kar

phir vatan ko lauTā hazār tarrār o tez āñkheñ purāne

ġhurfoñ se jhāñk uTThīñ hujūm piir o javāñ kā

gahrā hujūm apne gharoñ se niklā abū-lahab ke julūs

ko dekhne ko lapkā

abū-lahab ik shab-e-zafāf-e-abū-lahab kā jalā

phaphūlā ḳhayāl kī ret kā bagūlā vo ishq-e-barbād

kā heyūlā hujūm meñ se pukār uTThī abū-lahab

tū vahī hai jis kī dulhan jab aa.ī to sar pe īñdhan

gale meñ sāñpoñ ke haar laa.ī

abū-lahab ek lamha ThiThkā lagām thāmī lagā.ī

mahmez abū-lahab kī ḳhabar na aa.ī

shab-e-zafaf-e-abu-lahab thi magar KHudaya wo kaisi shab thi

abu-lahab ki dulhan jab aai to sar pe indhan gale mein

sanpon ke haar lai na us ko mashshatgi se matlab

na mang ghaza na rang roghan gale mein sanpon

ke haar us ke to sar pe indhan

KHudaya kaisi shab-e-zafaf-e-abu-lahab thi

ye dekhte hi hujum biphra bhaDak uThe yun ghazab

ki shole ke jaise nange badan pe jabir ke taziyane

jawan laDkon ki taliyan thi na sehan mein shoKH

laDkiyon ke thirakte panw thirak rahe the

na naghma baqi na shadyane

abu-lahab ne ye rang dekha lagam thami lagai

mahmez abu-lahab ki KHabar na aai

abu-lahab ki KHabar jo aai to sal-ha-sal ka zamana

ghubar ban kar bikhar chuka tha

abu-lahab ajnabi zaminon ke lal o gauhar sameT kar

phir watan ko lauTa hazar tarrar o tez aankhen purane

ghurfon se jhank uTThin hujum pir o jawan ka

gahra hujum apne gharon se nikla abu-lahab ke julus

ko dekhne ko lapka

abu-lahab ek shab-e-zafaf-e-abu-lahab ka jala

phaphula KHayal ki ret ka bagula wo ishq-e-barbaad

ka heyula hujum mein se pukar uTThi abu-lahab

tu wahi hai jis ki dulhan jab aai to sar pe indhan

gale mein sanpon ke haar lai

abu-lahab ek lamha ThiThka lagam thami lagai

mahmez abu-lahab ki KHabar na aai