adhure mausamon ka na-tamam qissa

ye kaun jaane

ki kal kā sūraj

nahīf jismoñ sulagtī rūhoñ pe

kaise kaise azaab laa.e

ga.ī rutoñ se javāb māñge

nazar nazar meñ sarāb laa.e

ye kaun jāne!

ye kaun maane

ki lauh-e-ehsās par ga.e mausamoñ ke jitne bhī

naqsh kanda haiñ

sab ke sab

aane vaalī saa.at ko ā.īna haiñ

jo aañkh paḌh le

to marsiya haiñ

ye kaun dekhe ye, kaun samjhe

ki sub.h-e-kāzib kī bārgāhoñ meñ sar-ba-sajda amiin chehre

kaḌī masāfat pe paañv dharne se peshtar hī

girāñ naqābeñ ulaT rahe haiñ

rah-e-riyā ko palaT rahe haiñ

ye kaun samjhe ye kaun jāne!!

ye kaun jaane

ki kal ka suraj

nahif jismon sulagti ruhon pe

kaise kaise azab lae

gai ruton se jawab mange

nazar nazar mein sarab lae

ye kaun jaane!

ye kaun mane

ki lauh-e-ehsas par gae mausamon ke jitne bhi

naqsh kanda hain

sab ke sab

aane wali saat ko aaina hain

jo aankh paDh le

to marsiya hain

ye kaun dekhe ye, kaun samjhe

ki subh-e-kazib ki bargahon mein sar-ba-sajda amin chehre

kaDi masafat pe panw dharne se peshtar hi

giran naqaben ulaT rahe hain

rah-e-riya ko palaT rahe hain

ye kaun samjhe ye kaun jaane!!