adhuri

naḳhl-e-numū kī shāḳh pe jis dam

nam kī aañch kī sarshārī meñ

pañkh apne phailā kar ġhuncha

puurī taab se khil uThtā hai

rañg aur ḳhushbū kī baanī meñ

zāt-o-hayāt ke kitne nukte

puure vajūd se kah detā hai

ye nahīñ jāntā kaise kaise

rut ke bhed havā ke tevar

phir bhī an-kahe rah jaate haiñ

dekhte dekhte rañg aur ḳhushbū

aap hī maddham ho jaate haiñ

puurī baat kahī nahīñ jaatī

baat adhūrī rah jaatī hai

raste ḳhatm kabhī nahīñ hote

rastoñ ke aage raste haiñ

ārzūoñ andeshoñ jaise

rastoñ meñ raste uljhe haiñ

in rastoñ ke raahī saare

thak thak raah meñ rah jaate haiñ

raste ḳhatm kabhī nahīñ hote

bātoñ ke pīchhe bāteñ haiñ

chehre saaf nazar nahīñ aate

chehre chilman ban jaate haiñ

chehroñ ke pīchhe chehre haiñ

chehre maddham ho jaate haiñ

manzar mub.ham ho jaate haiñ

diid nasīb kise hotī hai

dil meñ duurī rah jaatī hai

puurī baat kahe kyā koī

puurī baat kahī hai kis ne

baat adhūrī rah jaatī hai

naKHl-e-numu ki shaKH pe jis dam

nam ki aanch ki sarshaari mein

pankh apne phaila kar ghuncha

puri tab se khil uThta hai

rang aur KHushbu ki bani mein

zat-o-hayat ke kitne nukte

pure wajud se kah deta hai

ye nahin jaanta kaise kaise

rut ke bhed hawa ke tewar

phir bhi an-kahe rah jate hain

dekhte dekhte rang aur KHushbu

aap hi maddham ho jate hain

puri baat kahi nahin jati

baat adhuri rah jati hai

raste KHatm kabhi nahin hote

raston ke aage raste hain

aarzuon andeshon jaise

raston mein raste uljhe hain

in raston ke rahi sare

thak thak rah mein rah jate hain

raste KHatm kabhi nahin hote

baaton ke pichhe baaten hain

chehre saf nazar nahin aate

chehre chilman ban jate hain

chehron ke pichhe chehre hain

chehre maddham ho jate hain

manzar mubham ho jate hain

did nasib kise hoti hai

dil mein duri rah jati hai

puri baat kahe kya koi

puri baat kahi hai kis ne

baat adhuri rah jati hai