ai subh-e-watan

ai sub.h-e-vatan ai sub.h-e-vatan

ai rūh-e-bahār ai jān-e-chaman

ai mutrib yā ai sāqī-e-man

ai sub.h-e-vatan ai sub.h-e-vatan

le josh-e-junūñ kī zarboñ ne zanjīr-e-ġhulāmī toḌ hī dī

jamhūr ke sañgīñ panje ne shāhī kī kalā.ī moḌ hī dī

tārīḳh ke ḳhūnīñ hāthoñ se chhīnā hai tirā sīmīñ dāman

ai sub.h-e-vatan ai sub.h-e-vatan

phir lauT ke aayā sadiyoñ meñ iqbāl-o-tarab kā sayyāra

kirnoñ meñ ufuq par phir chamkā pastī ke añdheroñ kā maarā

hairāñ hairāñ nāzāñ nāzāñ ḳhandāñ ḳhandāñ raushan raushan

ai sub.h-e-vatan ai sub.h-e-vatan

dhartī ke tabassum se chamke āfāq-e-abad ke sayyāre

zulmat ke tarannum se phūTe nūr-e-abadiyyat ke dhāre

zarroñ ko taġhayyur ne baḳhshā ik mo.ajiza-e-ḳhurshīd-shikan

ai sub.h-e-vatan ai sub.h-e-vatan

so.e hue zarre jaag uThe anvār-e-sahar bedār hue

ehsās-e-zamīñ bedār huā afkār-e-bashar bedār hue

bistar se ḳhazaf reze uTThe aur la.al-o-gohar bedār hue

āñkhoñ ko milā gulzāroñ ne shāḳhoñ par samar bedār hue

nainoñ se mastī barsātī lo jaag uThī hastī kī dūlhan

ai sub.h-e-vatan ai sub.h-e-vatan

banjar dhartī kī nas nas meñ paudoñ kā taḳhayyul lahrāyā

ujḌe khetoñ par saaya hai gehūñ ke sunahrī ḳhoshoñ kā

har barg-e-fasurda ne khīñchā doshīza bahāroñ kā dāman

ai sub.h-e-vatan ai sub.h-e-vatan

sunsān bayābānoñ meñ hai ik jazba-e-gulshan-ārā.ī

vīrāñ khañDaroñ meñ letā hai mahloñ kā tasavvur añgḌā.ī

siipī kī rū-pahlī jholī meñ haiñ aaj hazāroñ durr-e-adan

ai sub.h-e-vatan ai sub.h-e-vatan

zarrāt meñ karvaT lene lage so lāla-ruḳhsān-o-māh-e-jabīñ

sañgīn chaTānoñ meñ jaage asnām ke ḳhadd-o-ḳhāl-e-hasīñ

hai dair ki ka.aba kyā jaane hai kaun sā aalam zer-e-zamīñ

masjūd nahīñ hai koī bhī sajde meñ magar jhuktī hai jabīñ

naqqāsh hai terī parchhā.īñ aazar hai tire sūraj kī kiran

ai sub.h-e-vatan ai sub.h-e-vatan

aahan kī salābat meñ ubhrā ma.asūm tasavvur narmī kā

phūloñ kī latāfat meñ umDā aahan ban jaane kā jazba

qarnoñ kī ḳhamoshī ko hasrat hai sail-e-bayāñ ban jaane kā

sadiyoñ kī udāsī ko zid hai ik nutq-e-javāñ ban jaane kā

har saañs ke andar ġhaltāñ hai taġh.īr ke siine kī dhaḌkan

ai sub.h-e-vatan ai sub.h-e-vatan

parbat parbat sāgar sāgar parcham apnā lahrātā hai

mahloñ pe miloñ pe qiloñ par azmat ke tarāne gaatā hai

gul-bār ridā-e-āzādī sarshār javānī kā parcham

ye amn ke naġhmoñ kā mutrib ḳhāmosh baġhāvat kā ye alam

tahzīb kā ye zarrīñ āñchal ta.amīr kā ye rañgīñ dāman

ai sub.h-e-vatan ai sub.h-e-vatan

qindīl-e-sahar nūr-e-manzil ḳhurshīd-e-sahar sham-e-sāhil

ye ḳhūn-e-shahīdāñ kā maḳhzan ye dard-e-rafīqāñ kā hāsil

ye amn kā lahrātā gesū ye sidq-o-mohabbat kā darpan

ai sub.h-e-vatan ai sub.h-e-vatan

ab khetoñ meñ gandum hī nahīñ sonā bhī ugegā ai saaqī

baḳhshegā taġhayyur bhūkoñ ko ik roz mizāj-e-zarrātī

ab hiire motī ugleñge ye bāġh-o-sahrā koh-o-daman

ai sub.h-e-vatan ai sub.h-e-vatan

gaañv ko sunā.eñge muzhda ehsār-e-hasīñ ban jaane kā

zarroñ ko sandesa deñge taḌap kar mahr-jabīñ ban jaane kā

aur tere ufuq kī laalī se hote haiñ sitāre bhī raushan

ai sub.h-e-vatan ai sub.h-e-vatan

ab ḳhaak qadam majbūroñ kī barsā.egī duniyā par sonā

ab atlas kī qismat hogī pairāhan-e-mehnat-kash honā

paḌte hī nigāh-e-sā.iqa-e-zan jal uTThegā har nazm-e-kuhan

ai sub.h-e-vatan ai sub.h-e-vatan

khetoñ kī zamīñ ūñchī ho kar firdaus se rishta joḌegī

ab hal kī anī sarmastī meñ ākāsh ke taare toḌegī

vo din bhī ab kuchh duur nahīñ jab sayyāre hoñge āñgan

ai sub.h-e-vatan ai sub.h-e-vatan

ai subh-e-watan ai subh-e-watan

ai ruh-e-bahaar ai jaan-e-chaman

ai mutrib ya ai saqi-e-man

ai subh-e-watan ai subh-e-watan

le josh-e-junun ki zarbon ne zanjir-e-ghulami toD hi di

jamhur ke sangin panje ne shahi ki kalai moD hi di

tariKH ke KHunin hathon se chhina hai tera simin daman

ai subh-e-watan ai subh-e-watan

phir lauT ke aaya sadiyon mein iqbaal-o-tarab ka sayyara

kirnon mein ufuq par phir chamka pasti ke andheron ka mara

hairan hairan nazan nazan KHandan KHandan raushan raushan

ai subh-e-watan ai subh-e-watan

dharti ke tabassum se chamke aafaq-e-abad ke sayyare

zulmat ke tarannum se phuTe nur-e-abadiyyat ke dhaare

zarron ko taghayyur ne baKHsha ek moajiza-e-KHurshid-shikan

ai subh-e-watan ai subh-e-watan

soe hue zarre jag uThe anwar-e-sahar bedar hue

ehsas-e-zamin bedar hua afkar-e-bashar bedar hue

bistar se KHazaf reze uTThe aur lal-o-gohar bedar hue

aankhon ko mila gulzaron ne shaKHon par samar bedar hue

nainon se masti barsati lo jag uThi hasti ki dulhan

ai subh-e-watan ai subh-e-watan

banjar dharti ki nas nas mein paudon ka taKHayyul lahraya

ujDe kheton par saya hai gehun ke sunahri KHoshon ka

har barg-e-fasurda ne khincha doshiza bahaaron ka daman

ai subh-e-watan ai subh-e-watan

sunsan bayabanon mein hai ek jazba-e-gulshan-arai

viran khanDaron mein leta hai mahlon ka tasawwur angDai

sipi ki ru-pahli jholi mein hain aaj hazaron durr-e-adan

ai subh-e-watan ai subh-e-watan

zarraat mein karwaT lene lage so lala-ruKHsan-o-mah-e-jabin

sangin chaTanon mein jage asnam ke KHadd-o-KHal-e-hasin

hai dair ki kaba kya jaane hai kaun sa aalam zer-e-zamin

masjud nahin hai koi bhi sajde mein magar jhukti hai jabin

naqqash hai teri parchhain aazar hai tere suraj ki kiran

ai subh-e-watan ai subh-e-watan

aahan ki salabat mein ubhra masum tasawwur narmi ka

phulon ki latafat mein umDa aahan ban jaane ka jazba

qarnon ki KHamoshi ko hasrat hai sail-e-bayan ban jaane ka

sadiyon ki udasi ko zid hai ek nutq-e-jawan ban jaane ka

har sans ke andar ghaltan hai taghir ke sine ki dhaDkan

ai subh-e-watan ai subh-e-watan

parbat parbat sagar sagar parcham apna lahraata hai

mahlon pe milon pe qilon par azmat ke tarane gata hai

gul-bar rida-e-azadi sarshaar jawani ka parcham

ye amn ke naghmon ka mutrib KHamosh baghawat ka ye alam

tahzib ka ye zarrin aanchal tamir ka ye rangin daman

ai subh-e-watan ai subh-e-watan

qindil-e-sahar nur-e-manzil KHurshid-e-sahar sham-e-sahil

ye KHun-e-shahidan ka maKHzan ye dard-e-rafiqan ka hasil

ye amn ka lahraata gesu ye sidq-o-mohabbat ka darpan

ai subh-e-watan ai subh-e-watan

ab kheton mein gandum hi nahin sona bhi ugega ai saqi

baKHshega taghayyur bhukon ko ek roz mizaj-e-zarraati

ab hire moti uglenge ye bagh-o-sahra koh-o-daman

ai subh-e-watan ai subh-e-watan

ganw ko sunaenge muzhda ehsar-e-hasin ban jaane ka

zarron ko sandesa denge taDap kar mahr-jabin ban jaane ka

aur tere ufuq ki lali se hote hain sitare bhi raushan

ai subh-e-watan ai subh-e-watan

ab KHak qadam majburon ki barsaegi duniya par sona

ab atlas ki qismat hogi pairahan-e-mehnat-kash hona

paDte hi nigah-e-saiqa-e-zan jal uTThega har nazm-e-kuhan

ai subh-e-watan ai subh-e-watan

kheton ki zamin unchi ho kar firdaus se rishta joDegi

ab hal ki ani sarmasti mein aakash ke tare toDegi

wo din bhi ab kuchh dur nahin jab sayyare honge aangan

ai subh-e-watan ai subh-e-watan