apne bad-guman se

apne bad-gumāñ se

tum samajhtī ho ki maiñ sar-ḳhush-e-taufīq-e-nashāt

aaj vaisā hī balā-kosh huuñ jaise kabhī thā

tum ne shāyad ye sunā hai ki is añdherī meñ bhī

maiñ usī tarah jalā.e huuñ umañgoñ kā diyā

ai mirī jān-e-vafā rañj ko rāhat na kaho

ek afasāna-e-sāda ko haqīqat na kaho

tum ne tanzan ye kahā hai ki mirā shaġhl-e-adab

mirī taskīñ kā bahar-hāl sahārā hogā

ai mirī turfa-jafākār vo din duur nahīñ

jab mujhe merā adab jaan se pyārā hogā

aaj lekin sar-e-bāzār ye dhan luTtā hai

naġhma-o-sher kā har saañs pe dam ghuTtā hai

aaj har phuul ke pahlū se dhuāñ uThtā hai

nik.hat-o-rañg nahīñ aaj kā mauzū-e-suḳhan

aaj dil-ḳhasta-o-maj.hūl hai ehsās-e-jamāl

aaj ik biphrī huī chīḳh hai fankār kā fan

aaj har sinf-e-latāfat meñ hai bevpār kā ruup

chāñdnī kyā ho jahāñ khul ke nikaltī na ho dhuup

zindagī kā ye tazabzub ye jumūd-e-vijdān

rāh-rau ke liye ik moḌ hai manzil to nahīñ

daur-e-tafrīt meñ ye kashmakash-e-zauq-e-hayāt

ruḳh badaltī huī ik dhaar hai sāhil to nahīñ

kyā karūñ aisī masarrat kā sahārā le kar

paar jaatī nahīñ kashtī bhī kinārā le kar

haañ ye sach hai ki yahāñ mil ga.e haiñ kuchh ahbāb

jin ko ab tak nahīñ ehsās-e-javāñ-margī-e-dil

zindagī un ke liye rakhtī hai kuchh imkānāt

bhūle-bisre vo sajā lete haiñ apnī mahfil

tum magar ḳhud hī kaho aaj kī duniyā kyā hai

ye to socho ki zamāne kā taqāzā kyā hai

aaj insān kī qismat meñ farāġhat hī nahīñ

vaqt vo hai ki koī vaqt kī qīmat hī nahīñ

yuuñ har ik jaan pe taarī hai zarūrat-mandī

sab zarūrī hai mohabbat kī zarūrat hī nahīñ

aise māhaul meñ unvān-e-tarab kyā hogā

jab har ik saañs pe kahtī ho ki ab kyā hogā

apne bad-guman se

tum samajhti ho ki main sar-KHush-e-taufiq-e-nashat

aaj waisa hi bala-kosh hun jaise kabhi tha

tum ne shayad ye suna hai ki is andheri mein bhi

main usi tarah jalae hun umangon ka diya

ai meri jaan-e-wafa ranj ko rahat na kaho

ek afasana-e-sada ko haqiqat na kaho

tum ne tanzan ye kaha hai ki mera shaghl-e-adab

meri taskin ka bahar-haal sahaara hoga

ai meri turfa-jafakar wo din dur nahin

jab mujhe mera adab jaan se pyara hoga

aaj lekin sar-e-bazar ye dhan luTta hai

naghma-o-sher ka har sans pe dam ghuTta hai

aaj har phul ke pahlu se dhuan uThta hai

nikhat-o-rang nahin aaj ka mauzu-e-suKHan

aaj dil-KHasta-o-majhul hai ehsas-e-jamal

aaj ek biphri hui chiKH hai fankar ka fan

aaj har sinf-e-latafat mein hai bewpar ka rup

chandni kya ho jahan khul ke nikalti na ho dhup

zindagi ka ye tazabzub ye jumud-e-wijdan

rah-rau ke liye ek moD hai manzil to nahin

daur-e-tafrit mein ye kashmakash-e-zauq-e-hayat

ruKH badalti hui ek dhaar hai sahil to nahin

kya karun aisi masarrat ka sahaara le kar

par jati nahin kashti bhi kinara le kar

han ye sach hai ki yahan mil gae hain kuchh ahbab

jin ko ab tak nahin ehsas-e-jawan-margi-e-dil

zindagi un ke liye rakhti hai kuchh imkanat

bhule-bisre wo saja lete hain apni mahfil

tum magar KHud hi kaho aaj ki duniya kya hai

ye to socho ki zamane ka taqaza kya hai

aaj insan ki qismat mein faraghat hi nahin

waqt wo hai ki koi waqt ki qimat hi nahin

yun har ek jaan pe tari hai zarurat-mandi

sab zaruri hai mohabbat ki zarurat hi nahin

aise mahaul mein unwan-e-tarab kya hoga

jab har ek sans pe kahti ho ki ab kya hoga