barish

tū āfāq se qatra qatra girtī hai

sannāTe ke ziine se

is dhartī ke siine meñ

tū tārīḳh ke aivānoñ meñ dar aatī hai

aur bahā le jaatī hai

jazboñ aur īmānoñ ko

maile dastar-ḳhvānoñ ko

tū jab banjar dhartī ke māthe ko bosa detī hai

kitnī soī āñkheñ karvaT letī haiñ

tū aatī hai

aur tirī aamad ke nam se

pyāse bartan bhar jaate haiñ

tere haath baḌhe aate haiñ

gadlī nīndeñ le jaate haiñ

terī lambī poroñ se

diloñ meñ girheñ khul jaatī haiñ

kaalī rāteñ dhul jaatī haiñ

tū aatī hai

pāgal āvāzoñ kā kīchaḌ

saḌkoñ par uḌne lagtā hai

tū aatī hai

aur uḌā le jaatī hai

ḳhāmoshī ke ḳhemoñ ko

aur hoñToñ kī shāḳhoñ par

motī Dolne lagte haiñ

panchhī bolne lagte haiñ

tū jab band kivāḌoñ meñ aur diloñ par dastak detī hai

saarī bāteñ kah jaane ko jī kartā hai

tere saath hī

bah jaane ko jī kartā hai

tu aafaq se qatra qatra girti hai

sannaTe ke zine se

is dharti ke sine mein

tu tariKH ke aiwanon mein dar aati hai

aur baha le jati hai

jazbon aur imanon ko

maile dastar-KHwanon ko

tu jab banjar dharti ke mathe ko bosa deti hai

kitni soi aankhen karwaT leti hain

tu aati hai

aur teri aamad ke nam se

pyase bartan bhar jate hain

tere hath baDhe aate hain

gadli ninden le jate hain

teri lambi poron se

dilon mein girhen khul jati hain

kali raaten dhul jati hain

tu aati hai

pagal aawazon ka kichaD

saDkon par uDne lagta hai

tu aati hai

aur uDa le jati hai

KHamoshi ke KHemon ko

aur honTon ki shaKHon par

moti Dolne lagte hain

panchhi bolne lagte hain

tu jab band kiwaDon mein aur dilon par dastak deti hai

sari baaten kah jaane ko ji karta hai

tere sath hi

bah jaane ko ji karta hai