bahaar ka mausam

na garmiyoñ kā zor hai na sardiyoñ kī maar hai

na dhuup tan pe baar hai na ThanD nāgavār hai

havā bhī ḳhush-gavār hai na garm hai na sard hai

na bijliyāñ na āñdhiyāñ na abr hai na gard hai

haiñ sabza-zār in dinoñ pahāḌ dasht aur ban

hai sach to yuuñ bahār par hai āj-kal chaman chaman

haiñ jañgaloñ meñ sabz sabz khet lahlahā rahe

ajab adā se jhuum jhuum kar haiñ dil lubhā rahe

fazā meñ dilkashī hī kuchh ye aa ga.ī hai ab na.ī

nazar paḌī jo khet par to kheltī chalī ga.ī

ḳhizāñ ne peḌoñ ke libās pheñke the utaar kar

dulhan banā diyā unheñ bahār ne sañvār kar

chaman ke phuul dekh kar hamārī aql dañg hai

banafsha.ī safed surḳh zard un kā rañg hai

diloñ meñ hai kuchh āj-kal umañg sī bharī huī

masarratoñ ke josh se kalī kalī khilī huī

nikhar ga.iiñ mahāvaToñ kī bārishoñ se pattiyāñ

nithar nithar ke saaf ho ga.iiñ tamām naddiyāñ

haiñ peḌoñ meñ chhupe hue parind chahchahā rahe

ḳhudā kī shaan dekh kar ḳhushī se haiñ vo gā rahe

ye lutf dekh dekh kar zabāñ pe baar baar hai

ye mausam-e-bahār hai ye mausam-e-bahār hai

na garmiyon ka zor hai na sardiyon ki mar hai

na dhup tan pe bar hai na ThanD nagawar hai

hawa bhi KHush-gawar hai na garm hai na sard hai

na bijliyan na aandhiyan na abr hai na gard hai

hain sabza-zar in dinon pahaD dasht aur ban

hai sach to yun bahaar par hai aaj-kal chaman chaman

hain jangalon mein sabz sabz khet lahlaha rahe

ajab ada se jhum jhum kar hain dil lubha rahe

faza mein dilkashi hi kuchh ye aa gai hai ab nai

nazar paDi jo khet par to khelti chali gai

KHizan ne peDon ke libas phenke the utar kar

dulhan bana diya unhen bahaar ne sanwar kar

chaman ke phul dekh kar hamari aql dang hai

banafshai safed surKH zard un ka rang hai

dilon mein hai kuchh aaj-kal umang si bhari hui

masarraton ke josh se kali kali khili hui

nikhar gain mahawaTon ki barishon se pattiyan

nithar nithar ke saf ho gain tamam naddiyan

hain peDon mein chhupe hue parind chahchaha rahe

KHuda ki shan dekh kar KHushi se hain wo ga rahe

ye lutf dekh dekh kar zaban pe bar bar hai

ye mausam-e-bahaar hai ye mausam-e-bahaar hai