barahana

farañgī jarīdoñ ke aurāq-e-rañgīn

hañstī, lachaktī, dhaḌaktī, lakīreñ

kaTīle badan teġh kī dhaar jaise!

lahū ras meñ gūñdhe hue jism, resham ke ambār jaise!

nigah jin pe phisle, vo shāne vo bāheñ

mudavvar uThāneñ, munavvar Dhalāneñ,

har ik naqsh meñ ziist kī tāzgī hai

har ik rañg se khaultī ārzūoñ kī aañch aa rahī hai!

ḳhutūt-e-barahana ke in ā.īnoñ meñ

hasīñ paikaroñ ke shaffāf ḳhāke

ki jin ke sajal ruup meñ kheltī haiñ

vo ḳhushiyāñ jo sadiyoñ se bojhal ke ojhal rahī haiñ!

unheñ phūñk degī be-mehr duniyā

farañgī jarīdoñ ke aurāq-e-rañgīn

ko ik baar hasrat se tak lo

phir un ko hifāzat se apne diloñ ke muqaffal darāzoñ meñ rakh lo!

farangi jaridon ke auraq-e-rangin

hansti, lachakti, dhaDakti, lakiren

kaTile badan tegh ki dhaar jaise!

lahu ras mein gundhe hue jism, resham ke ambar jaise!

nigah jin pe phisle, wo shane wo bahen

mudawwar uThanen, munawwar Dhalanen,

har ek naqsh mein zist ki tazgi hai

har ek rang se khaulti aarzuon ki aanch aa rahi hai!

KHutut-e-barahana ke in aainon mein

hasin paikaron ke shaffaf KHake

ki jin ke sajal rup mein khelti hain

wo KHushiyan jo sadiyon se bojhal ke ojhal rahi hain!

unhen phunk degi be-mehr duniya

farangi jaridon ke auraq-e-rangin

ko ek bar hasrat se tak lo

phir un ko hifazat se apne dilon ke muqaffal daraazon mein rakh lo!