basti ki laDkiyon ke nam

chal ai nasīm-e-sahrā rūh-o-ravān-e-sahrā

merā payām le jā sū-e-butān-e-sahrā

sahrā.ī mahvashoñ kī ḳhidmat meñ jā ke kahnā

bhūle nahīñ tumheñ ham ai duḳhtarān-e-sahrā

gar bas chale to aa.eñ aur dard-e-dil sunā.eñ

tum ko gale lagā.eñ ham phir miyān-e-sahrā

tum najd meñ pareshāñ shahroñ meñ ham haiñ hairāñ

allāh kī amaañ ho tum par butān-e-sahrā

tum is tarah ġhamoñ se behāl ho rahī ho

ham is taraf haiñ muztar dāman-kushān-e-sahrā

ham paas aa.eñ kyuuñ kar tum ko bulā.eñ kyuuñ kar

ye dukh miTā.eñ kyuuñ kar vāmāñdgān-e-sahrā

betāb haiñ alam se be-ḳhvāb ranj-o-ġham se

kyā pūchhtī ho ham se ai dil-barān-e-sahrā

tum yaad kar rahī ho bedād kar rahī ho

barbād kar rahī ho ai gul-ruḳhān-e-sahrā

ye kyā kahā ki tum ho rañgīniyoñ ke ḳhūgar

ġhamgīñ haiñ tum se baḌh kar ai ġham-kushān-e-sahrā

ye raat ye ghaTā.eñ ye shor ye havā.eñ

bichhḌe hue mileñge kyūñkar miyān-e-sahrā

shahroñ kī zindagī se ham tañg aa chuke haiñ

sahrā meñ phir bulā lo ai sakinān-e-sahrā

yād-e-sumūm ho yā sarsar ke tund tūfāñ

Darte nahīñ kisī se dil-dādgān-e-sahrā

ābādiyoñ meñ hāsil āzādiyāñ nahīñ haiñ

aa jaao tum hī uḌ kar o tā.irān-e-sahrā

sahrā kī vus.atoñ meñ ham ko na bhuul jaanā

o duḳhtarān-e-sahrā o āhuvān-e-sahrā

ai abr chup na rahnā merā fasāna kahnā

mil jaa.e gar kahīñ vo sarv-e-ravān-e-sahrā

dashtī kī dhun meñ saaqī ik naġhma-e-īrāqī

haañ phir sunā ba-yād-e-gul-chehargān-e-sahrā

āñkhoñ meñ bas rahā hai naqsh-e-butān-e-sahrā

o dāstāñ-sarā chheḌ ik dāstān-e-sahrā

mastāna jā rahā hai phir karvān-e-sahrā

haañ jhuum kar hudī-ḳhvāñ ik dāstān-e-sahrā

dehāt kī fazā.eñ āñkhoñ meñ phir rahī haiñ

dil meñ samā rahī hai yād-e-butān-e-sahrā

nazroñ pe chhā rahā hai vo chāñdnī kā manzar

sahrā meñ kheltī thiiñ jab hūryān-e-sahrā

vo chāñdnī kā mausam vo be-ḳhudī kā aalam

vo nuur kā samundar reg-e-ravān-e-sahrā

jalve mah-e-javāñ ke vo rañg-e-kārvāñ ke

vo naġhme sārbāñ ke raqsāñ miyān-e-sahrā

kyūñkar na yaad aa.eñ vo sīm-gūñ fazā.eñ

vo āsmān-e-sahrā māh-e-ravān-e-sahrā

vo kam-sinoñ ke gaane vo khel vo tarāne

be-fikrī ke fasāne vird-e-zabān-e-sahrā

khetoñ meñ ghūmte the har gul ko chūmte the

mastī meñ jhūmte the jab mai-kashān-e-sahrā

vo gaañv vo fazā.eñ vo fasl vo havā.eñ

vo khet vo ghaTā.eñ vo āsmān-e-sahrā

phir yaad aa rahī haiñ phir dil dukhā rahī haiñ

majnūñ banā rahī haiñ lailā-vashān-e-sahrā

rātoñ ko chhup ke aanā aur shāne ko hilānā

hai yaad vo jagānā ham ko miyān-e-sahrā

vo un kī shoḳh āñkheñ vo un kī saada nazreñ

be-ḳhud banā rahī haiñ doshīzgān-e-sahrā

vo ishq-pesha huuñ maiñ jis ke javān naġhme

gaatā hai chāñdnī meñ har naujavān-e-sahrā

ik badviyat kā āshiq sahrā.iyat se be-ḳhud

'aḳhtar' bhī apnī dhun meñ hai ik javān-e-sahrā

chal ai nasim-e-sahra ruh-o-rawan-e-sahra

mera payam le ja su-e-butan-e-sahra

sahrai mahwashon ki KHidmat mein ja ke kahna

bhule nahin tumhein hum ai duKHtaran-e-sahra

gar bas chale to aaen aur dard-e-dil sunaen

tum ko gale lagaen hum phir miyan-e-sahra

tum najd mein pareshan shahron mein hum hain hairan

allah ki aman ho tum par butan-e-sahra

tum is tarah ghamon se behaal ho rahi ho

hum is taraf hain muztar daman-kushan-e-sahra

hum pas aaen kyun kar tum ko bulaen kyun kar

ye dukh miTaen kyun kar wamandgan-e-sahra

betab hain alam se be-KHwab ranj-o-gham se

kya puchhti ho hum se ai dil-baran-e-sahra

tum yaad kar rahi ho bedad kar rahi ho

barbaad kar rahi ho ai gul-ruKHan-e-sahra

ye kya kaha ki tum ho ranginiyon ke KHugar

ghamgin hain tum se baDh kar ai gham-kushan-e-sahra

ye raat ye ghaTaen ye shor ye hawaen

bichhDe hue milenge kyunkar miyan-e-sahra

shahron ki zindagi se hum tang aa chuke hain

sahra mein phir bula lo ai sakinan-e-sahra

yaad-e-sumum ho ya sarsar ke tund tufan

Darte nahin kisi se dil-dadgan-e-sahra

aabaadiyon mein hasil aazadiyan nahin hain

aa jao tum hi uD kar o tairan-e-sahra

sahra ki wusaton mein hum ko na bhul jaana

o duKHtaran-e-sahra o aahuwan-e-sahra

ai abr chup na rahna mera fasana kahna

mil jae gar kahin wo sarw-e-rawan-e-sahra

dashti ki dhun mein saqi ek naghma-e-iraqi

han phir suna ba-yaad-e-gul-chehargan-e-sahra

aankhon mein bas raha hai naqsh-e-butan-e-sahra

o dastan-sara chheD ek dastan-e-sahra

mastana ja raha hai phir karwan-e-sahra

han jhum kar hudi-KHwan ek dastan-e-sahra

dehat ki fazaen aankhon mein phir rahi hain

dil mein sama rahi hai yaad-e-butan-e-sahra

nazron pe chha raha hai wo chandni ka manzar

sahra mein khelti thin jab huryan-e-sahra

wo chandni ka mausam wo be-KHudi ka aalam

wo nur ka samundar reg-e-rawan-e-sahra

jalwe mah-e-jawan ke wo rang-e-karwan ke

wo naghme sarban ke raqsan miyan-e-sahra

kyunkar na yaad aaen wo sim-gun fazaen

wo aasman-e-sahra mah-e-rawan-e-sahra

wo kam-sinon ke gane wo khel wo tarane

be-fikri ke fasane wird-e-zaban-e-sahra

kheton mein ghumte the har gul ko chumte the

masti mein jhumte the jab mai-kashan-e-sahra

wo ganw wo fazaen wo fasl wo hawaen

wo khet wo ghaTaen wo aasman-e-sahra

phir yaad aa rahi hain phir dil dukha rahi hain

majnun bana rahi hain laila-washan-e-sahra

raaton ko chhup ke aana aur shane ko hilana

hai yaad wo jagana hum ko miyan-e-sahra

wo un ki shoKH aankhen wo un ki sada nazren

be-KHud bana rahi hain doshizgan-e-sahra

wo ishq-pesha hun main jis ke jawan naghme

gata hai chandni mein har naujawan-e-sahra

ek badwiyat ka aashiq sahraiyat se be-KHud

'aKHtar' bhi apni dhun mein hai ek jawan-e-sahra