wahima

zindagī ke aise dorāhe par aa kar ruk gayā huuñ

har musāfir

kohar-ālūda fazā meñ

har qadam ehsās kī Dorī se

anjāne safar ke dhuup chhāñv nāpne meñ

ek andhe kī tarah

ḳhālī havāoñ meñ chhaḌī lahrā rahā hai

jis tarah jalte hue ma.azūr pattoñ kā

havā ke ruḳh par uThtā hai dhuāñ

auhām kī chādar chaḌhāne

rāsta dikhlāne vaale

chāñd sūraj aur sitāroñ ke mazāroñ par

maiñ daurān-e-safar

kis dhuñd meñ

aage kā rasta DhūñDhtā huuñ

rāsta baa.eñ jo jaatā hai

samundar paar

us raste ke mutavāzī kushāda rāste

ik dūsre ko kāTte haiñ

saare raste

un baḌe rastoñ ke uupar chal rahe haiñ

aur

daa.eñ samt jo rasta gayā hai

kitnā pur-asrār hai

chaḌhtā utrā

jaal sā bantā huā

chāroñ taraf se

ek markaz kī taraf jaane kā

sīdhā rāsta dikhlā rahā hai

kaisā dorāhā hai ye

maiñ zindagī ke kaise dorāhe par

apnā dāhinā paañv uThā.e

vāhime ke kohar meñ

apnī chhaḌī lahrā rahā huuñ

zindagi ke aise dorahe par aa kar ruk gaya hun

har musafir

kohar-aluda faza mein

har qadam ehsas ki Dori se

anjaane safar ke dhup chhanw napne mein

ek andhe ki tarah

KHali hawaon mein chhaDi lahra raha hai

jis tarah jalte hue mazur patton ka

hawa ke ruKH par uThta hai dhuan

auham ki chadar chaDhane

rasta dikhlane wale

chand suraj aur sitaron ke mazaron par

main dauran-e-safar

kis dhund mein

aage ka rasta DhunDhta hun

rasta baen jo jata hai

samundar par

us raste ke mutawazi kushada raste

ek dusre ko kaTte hain

sare raste

un baDe raston ke upar chal rahe hain

aur

daen samt jo rasta gaya hai

kitna pur-asrar hai

chaDhta utra

jal sa banta hua

chaaron taraf se

ek markaz ki taraf jaane ka

sidha rasta dikhla raha hai

kaisa doraha hai ye

main zindagi ke kaise dorahe par

apna dahina panw uThae

wahime ke kohar mein

apni chhaDi lahra raha hun