ai mere sar-sabz KHuda

bain karne vāloñ ne

mujhe adh khule haath se qubūl kiyā

insān ke do janam haiñ

phir shaam kā maqsad kyā hai

maiñ apnī nigrānī meñ rahī aur kam hotī chalī ga.ī

kuttoñ ne jab chāñd dekhā

apnī poshāk bhuul ga.e

maiñ sābit qadam hī TuuTī thī

ab tere bojh se dhañs rahī huuñ

tanhā.ī mujhe shikār kar rahī hai

ai mere sar-sabz ḳhudā

ḳhizāñ ke mausam meñ bhī maiñ ne tujhe yaad kiyā

qātil kī sazā maqtūl nahīñ

ġhaib kī jañgalī-bel ko ghar tak kaise lā.ūñ

phir āñkhoñ ke TaaT pe maiñ ne likkhā

maiñ āñkhoñ se martī

tū qadmoñ se zinda ho jaatī

bain karne walon ne

mujhe adh khule hath se qubul kiya

insan ke do janam hain

phir sham ka maqsad kya hai

main apni nigrani mein rahi aur kam hoti chali gai

kutton ne jab chand dekha

apni poshak bhul gae

main sabit qadam hi TuTi thi

ab tere bojh se dhans rahi hun

tanhai mujhe shikar kar rahi hai

ai mere sar-sabz KHuda

KHizan ke mausam mein bhi main ne tujhe yaad kiya

qatil ki saza maqtul nahin

ghaib ki jangali-bel ko ghar tak kaise laun

phir aankhon ke TaT pe main ne likkha

main aankhon se marti

tu qadmon se zinda ho jati