bhaTki hui bewa

barsāt kā mausam raat añdherī dil pe bhī haibat chhā.ī huī

thā peḌ nazar aatā na koī ghir ghir ghaTā thī aa.ī huī

tūfān thā bād-o-bārāñ kā bijlī bhī kaḌaktī phirtī thī

sardī se phaTā jaatā thā badan vo barf zamīñ par girtī thī

thī rāsta bhūlī ik beva aur daaġh jigar par khaa.ī huī

rag rag se Tapaktī hasrat thī aur sar pe ajal mañDlā.ī huī

thā baal rañDāpā sog nayā kapḌe the phaTe zaḳhmī thā jigar

miltī thī koī us ko na panāh phir phir ke palaT aatī thī nazar

biptā kī vo maarī aisī thī duniyā meñ koī dildār na thā

thī saarī ḳhudā.ī pesh-e-nazar par us kā koī ġham-ḳhvār na thā

māñ-bāp haiñ us ke jannat meñ aur sair haiñ karte shām-o-sahar

aur gor meñ bachche khelte haiñ saath apne pitā ke aaTh pahar

ye kheltā un ko dekh sake ik saudā samāyā thā sar meñ

siine se lagā kar pyaar kare thā shauq ye qalb-e-muztar meñ

pahlū meñ chhupā.e hasrat ko sahrāoñ meñ thī vo ghuum rahī

ruk ruk ke qadam ko baḌhātī thī mastoñ kī tarah thī jhuum rahī

āḳhir vo girī be-dam ho kar kāñToñ se ladī ik jhāḌī par

thā hosh na us ko apnā kuchh thā dil meñ na us ke ḳhauf-o-ḳhatar

jaatī hai fazā-e-jannat meñ dukh-dard vo saare bhūlegī

ulfat ke tarāne gā gā kar jhūle meñ ḳhushī ke jhūlegī

barsat ka mausam raat andheri dil pe bhi haibat chhai hui

tha peD nazar aata na koi ghir ghir ghaTa thi aai hui

tufan tha baad-o-baran ka bijli bhi kaDakti phirti thi

sardi se phaTa jata tha badan wo barf zamin par girti thi

thi rasta bhuli ek bewa aur dagh jigar par khai hui

rag rag se Tapakti hasrat thi aur sar pe ajal manDlai hui

tha baal ranDapa sog naya kapDe the phaTe zaKHmi tha jigar

milti thi koi us ko na panah phir phir ke palaT aati thi nazar

bipta ki wo mari aisi thi duniya mein koi dildar na tha

thi sari KHudai pesh-e-nazar par us ka koi gham-KHwar na tha

man-bap hain us ke jannat mein aur sair hain karte sham-o-sahar

aur gor mein bachche khelte hain sath apne pita ke aaTh pahar

ye khelta un ko dekh sake ek sauda samaya tha sar mein

sine se laga kar pyar kare tha shauq ye qalb-e-muztar mein

pahlu mein chhupae hasrat ko sahraon mein thi wo ghum rahi

ruk ruk ke qadam ko baDhati thi maston ki tarah thi jhum rahi

aaKHir wo giri be-dam ho kar kanTon se ladi ek jhaDi par

tha hosh na us ko apna kuchh tha dil mein na us ke KHauf-o-KHatar

jati hai faza-e-jannat mein dukh-dard wo sare bhulegi

ulfat ke tarane ga ga kar jhule mein KHushi ke jhulegi