bichhDe ghar ka saya

sub.h-savere

vo bistar se saa.e jaisī uThtī hai

phir chūlhe meñ raat kī ThanDī aag ko

raushan kartī hai

itne meñ din chaḌh jaatā hai

jaldī jaldī chaa.e banā kar shauhar ko ruḳhsat kartī hai

sayyāre gardish karte haiñ

shahr meñ sahrā sahrāoñ meñ chaTyal maidāñ

kohsāroñ ke nasheb-o-farāz banā karte haiñ

saare ghar ko dhotī hai

kapḌe tauliye tōth-brush bistar kī chādar

koī kitāb uThātī hai rakh detī hai

radio on kiyā phir rokā on kiyā

phir koī purānā ḳhat paḌhtī hai

(ghanTī bajī)

''maryam! aa jāo''

''tum kaisī ho? vo kaise haiñ''

''kyā us kā koī ḳhat āyā?''

(thoḌī ḳhāmoshī kā vaqfa)

''tum kaisī ho''

''tum se matlab? sach kah duuñ to kyā kar logī''

dekho sab kī sab baiThī hoñ

''achchhā''

''achchhā''

(darvāza phir band ho gayā)

''ab kyā karnā!

ghar to bilkul saaf paḌā hai

koī shikan bistar pe nahīñ hai

dīvār-o-dar dhule-dhulā.e

koī dhabba yā makḌī kā jaalā tinkā

kahīñ kuchh nahīñ

kyā karnā hai!

uf! vo calendar

kitne baras ho ga.e phir bhī

aa.eñ to un se kahtī huuñ

bilkul nayā calendar laa.eñ

kuchh bhuuk nahīñ

ab kyā karnā hai

leT rahūñ? lekin kyā leTūñ

jaane kitnā leT chukī huuñ

khaḌī rahūñ

haañ khaḌī rahūñ

par maiñ to kab se khaḌī huī huuñ

khiḌkī kā parda hī kholūñ

dhuup kahāñ tak aa pahuñchī hai

laao apnā album dekhūñ

nayyar shabnam shafaq subūhī aḳhtar juuhī

kaise hoñge

aañ! ye maiñ huuñ

ittī pyārī pyārī thī maiñ

maiñ bilkul hī bhuul ga.ī thī

sab kitnā achchhā lagtā thā

abbā, ammāñ, bhayyā, appī

sab zinda the

saaya naanī gulshan aapā

haañ aur vo gaurayyā baabā

aañsū naġhme shor Thahāke saare ik sur meñ hote the

saarī duniyā ghar lagtī thī

amaañ udhar bulāyā kartīñ

abbā udhar pukārā karte

bhayyā DāñTte

appī Dheroñ pyaar jatātīñ

khānā, pīnā, sonā, jāgnā, hañsnā, rūThnā, manñā

Dor bañdhī thī

ek meñ ek piroyā huā thā

kal nammū ke ghar shādī hai

paas hī koī maut huī hai

college kī chhaTī kab hogī

iid phir ab kī tiis kī hogī

ham bhī lail-e-qadr jāgeñge

shahlā kī mañgnī kyuuñ TūTī?

kyā iqbāl koī shā.er thaa?

chup baḌke abbā sun leñge

saa.e dauḌ rahe haiñ ghar meñ

har goshe meñ uupar nīche andar bāhar dauḌ rahe haiñ

lambe chhoTe sabz o zard hazāroñ saa.e

bāhar shahr meñ koī nahīñ hai

dhuup siyah paḌtī jaatī hai

qadd-e-ādam ā.īne meñ

us kā nañgā jism khaḌā hai

jism ke andar sūraj kā ġhuncha mahkā hai

sayyāre gardish karte haiñ

sab anjāne sayyāroñ meñ bhūle-bisre ghar raushan haiñ

kis lamhe kā hai ye tamāsha

hast-o-būd ke sannāTe meñ

lā-maujūd kī tārīkī meñ

sirf yahī ā.īna raushan

sirf ik aks-e-guzishta raushan

bichhḌe ghar kā saaya raushan

subh-sawere

wo bistar se sae jaisi uThti hai

phir chulhe mein raat ki ThanDi aag ko

raushan karti hai

itne mein din chaDh jata hai

jaldi jaldi chae bana kar shauhar ko ruKHsat karti hai

sayyare gardish karte hain

shahr mein sahra sahraon mein chaTyal maidan

kohsaron ke nasheb-o-faraaz bana karte hain

sare ghar ko dhoti hai

kapDe tauliye tooth-brush bistar ki chadar

koi kitab uThati hai rakh deti hai

radio on kiya phir roka on kiya

phir koi purana KHat paDhti hai

(ghanTi baji)

maryam! aa jao

tum kaisi ho? wo kaise hain

kya us ka koi KHat aaya?

(thoDi KHamoshi ka waqfa)

tum kaisi ho

tum se matlab? sach kah dun to kya kar logi

dekho sab ki sab baiThi hon

achchha

achchha

(darwaza phir band ho gaya)

ab kya karna!

ghar to bilkul saf paDa hai

koi shikan bistar pe nahin hai

diwar-o-dar dhule-dhulae

koi dhabba ya makDi ka jala tinka

kahin kuchh nahin

kya karna hai!

uf! wo calendar

kitne baras ho gae phir bhi

aaen to un se kahti hun

bilkul naya calendar laen

kuchh bhuk nahin

ab kya karna hai

leT rahun? lekin kya leTun

jaane kitna leT chuki hun

khaDi rahun

han khaDi rahun

par main to kab se khaDi hui hun

khiDki ka parda hi kholun

dhup kahan tak aa pahunchi hai

lao apna album dekhun

nayyar shabnam shafaq subuhi aKHtar juhi

kaise honge

aan! ye main hun

itti pyari pyari thi main

main bilkul hi bhul gai thi

sab kitna achchha lagta tha

abba, amman, bhayya, appi

sab zinda the

saya nani gulshan aapa

han aur wo gaurayya baba

aansu naghme shor Thahake sare ek sur mein hote the

sari duniya ghar lagti thi

aman udhar bulaya kartin

abba udhar pukara karte

bhayya DanTte

appi Dheron pyar jatatin

khana, pina, sona, jagna, hansna, ruThna, manna

Dor bandhi thi

ek mein ek piroya hua tha

kal nammu ke ghar shadi hai

pas hi koi maut hui hai

college ki chhaTi kab hogi

id phir ab ki tis ki hogi

hum bhi lail-e-qadr jagenge

shahla ki mangni kyun TuTi?

kya iqbaal koi shaer tha?

chup baDke abba sun lenge

sae dauD rahe hain ghar mein

har goshe mein upar niche andar bahar dauD rahe hain

lambe chhoTe sabz o zard hazaron sae

bahar shahr mein koi nahin hai

dhup siyah paDti jati hai

qadd-e-adam aaine mein

us ka nanga jism khaDa hai

jism ke andar suraj ka ghuncha mahka hai

sayyare gardish karte hain

sab anjaane sayyaron mein bhule-bisre ghar raushan hain

kis lamhe ka hai ye tamasha

hast-o-bud ke sannaTe mein

la-maujud ki tariki mein

sirf yahi aaina raushan

sirf ek aks-e-guzishta raushan

bichhDe ghar ka saya raushan