darbar1911

dekh aa.e ham bhī do din rah ke dehlī kī bahār

hukm-e-hākim se huā thā ijtamā-e-intishār

aadmī aur jānvar aur ghar muzayyan aur machine

phuul aur sabza chamak aur raushnī rail aur taar

kerosene aur barq aur petroleum aur tarpin

motor aur airplane aur jamghaTe aur eqtidār

mashriqī patlūñ meñ thī ḳhidmat-guzārī kī umañg

maġhribī shakloñ se shān-e-ḳhud-pasandī āshkār

shaukat-o-iqbāl ke markaz huzūr-e-emperor

zīnat-o-daulat kī devī empress ālī-tabār

bahr-e-hastī le rahā thā be-dareġh añgḌā.iyāñ

thames kī amvāj jamunā se huī thiiñ ham-kanār

inqilāb-e-dahr ke rañgīn naqshe pesh the

thī pa.e-ahl-e-basīrat bāġh-e-ibrat meñ bahār

zarre vīrānoñ se uThte the tamāshā dekhne

chashm-e-hairat ban ga.ī thī gardish-e-lail-o-nahār

jaame se bāhar nigāh-e-nāz-e-fattāhān-e-hind

hadd-e-qānūnī ke andar honorabloñ kī qatār

ḳharch kā total diloñ meñ chuTkiyāñ letā huā

fikr-e-zātī meñ ḳhayāl-e-qaum ġhā.eb fil-mazār

dāvateñ in.aam speacheñ qavā.id fauj camp

izzateñ ḳhushiyāñ ummīdeñ ehtiyāteñ e'tibār

pesh-rau shāhī thī phir his-highness phir ahl-e-jāh

ba.ad is ke shaiḳh sāhab un ke pīchhe ḳhāksār

dekh aae hum bhi do din rah ke dehli ki bahaar

hukm-e-hakim se hua tha ijtama-e-intishaar

aadmi aur jaanwar aur ghar muzayyan aur machine

phul aur sabza chamak aur raushni rail aur tar

kerosene aur barq aur petroleum aur tarpin

motor aur airplane aur jamghaTe aur eqtidar

mashriqi patlun mein thi KHidmat-guzari ki umang

maghribi shaklon se shan-e-KHud-pasandi aashkar

shaukat-o-iqbaal ke markaz huzur-e-emperor

zinat-o-daulat ki dewi empress aali-tabar

bahr-e-hasti le raha tha be-daregh angDaiyan

thames ki amwaj jamuna se hui thin ham-kanar

inqilab-e-dahr ke rangin naqshe pesh the

thi pae-ahl-e-basirat bagh-e-ibrat mein bahaar

zarre viranon se uThte the tamasha dekhne

chashm-e-hairat ban gai thi gardish-e-lail-o-nahaar

jame se bahar nigah-e-naz-e-fattahan-e-hind

hadd-e-qanuni ke andar honorablon ki qatar

KHarch ka total dilon mein chuTkiyan leta hua

fikr-e-zati mein KHayal-e-qaum ghaeb fil-mazar

dawaten inam speachen qawaid fauj camp

izzaten KHushiyan ummiden ehtiyaten e'tibar

pesh-rau shahi thi phir his-highness phir ahl-e-jah

baad is ke shaiKH sahab un ke pichhe KHaksar