dard-e-mushtarak

maiñ ne jo zulm kabhī tujh se ravā rakkhā thā

aaj usī zulm ke phande meñ giraftār huuñ maiñ

maiñ ne jo tiir tire haath se chhīnā thā kabhī

aaj usī tiir ke ghaav se nigūñ-sār huuñ maiñ

jis kī ḳhātir tirī zillat bhī gavārā thī mujhe

aaj usī ''paikar-e-ismat'' kā ḳhatā-kār huuñ maiñ

mirī ā.ankhoñ ne jise chāñd kahā thā kal tak

aaj usī sho.ala-e-parrāñ se araq-bār huuñ maiñ

tū na chāhe bhī to āfāq hañsegā mujh par

vaqt ke haath meñ TuuTī huī talvār huuñ maiñ

maiñ ne chāhā thā ki insān kī azmat ke liye

ek mazlūm javānī ko sahārā de duuñ

ek Thukrā.e hue pyaar ke sadme bāñTūñ

ek bhaTke hue raahī ko ishāra de duuñ

ek jhulse hue ehsās ko ThanDak baḳhshūñ

aur kaunain ko phir zauq-e-nazāra de duuñ

maiñ ne iḳhlās ke phūloñ se banā.e gajre

maiñ ne iḳhlās ke phūloñ se banā.e gajre

maiñ ne ehsās ke jhūloñ meñ jhulāyā us ko

maiñ ne roñdī huī rāhoñ pe bichhā.ī āñhkeñ

maiñ ne paiġhām sitāroñ kā sunāyā us ko

maiñ ne aflās ke dariyā kā tamavvuj pī kar

ik na.ī aas ke sāhil pe lagāyā us ko

aaj maiñ soch rahā huuñ shab-e-tanhā.ī meñ

kis qadar talḳh javānī kī luTī yādeñ haiñ

dekh is daur meñ aivān-e-mohabbat ke liye

kaisī kaisī ġham-o-andoh kī buniyādeñ haiñ

kal tire dīda-e-hairāñ se lahū phūTā thā

aaj mere lab-e-ḳhāmosh pe fariyādeñ haiñ

ye mohabbat ye vafā.eñ ye muravvat ye ḳhulūs

in ko sarmā.e ne be-kār banā rakkhā hai

husn aur husn ke har ek sanam-ḳhāne ko

zar-parastoñ ne jafākār banā rakkhā hai

aa ki us daur kā me.aar badalnā hai hameñ

jis ne har zehn ko bīmār banā rakkhā hai

aa ki us jins-e-girāñ-qadr ko bedār kareñ

jis ne ham sab ko ḳharīdār banā rakkhā hai

aa ki us fitna-e-zarposh ko uryāñ kar deñ

jis ne āfāq ko bāzār banā rakkhā hai

main ne jo zulm kabhi tujh se rawa rakkha tha

aaj usi zulm ke phande mein giraftar hun main

main ne jo tir tere hath se chhina tha kabhi

aaj usi tir ke ghaw se nigun-sar hun main

jis ki KHatir teri zillat bhi gawara thi mujhe

aaj usi paikar-e-ismat ka KHata-kar hun main

meri aaankhon ne jise chand kaha tha kal tak

aaj usi shoala-e-parran se araq-bar hun main

tu na chahe bhi to aafaq hansega mujh par

waqt ke hath mein TuTi hui talwar hun main

main ne chaha tha ki insan ki azmat ke liye

ek mazlum jawani ko sahaara de dun

ek Thukrae hue pyar ke sadme banTun

ek bhaTke hue rahi ko ishaara de dun

ek jhulse hue ehsas ko ThanDak baKHshun

aur kaunain ko phir zauq-e-nazara de dun

main ne iKHlas ke phulon se banae gajre

main ne iKHlas ke phulon se banae gajre

main ne ehsas ke jhulon mein jhulaya us ko

main ne rondi hui rahon pe bichhai aanhken

main ne paigham sitaron ka sunaya us ko

main ne aflas ke dariya ka tamawwuj pi kar

ek nai aas ke sahil pe lagaya us ko

aaj main soch raha hun shab-e-tanhai mein

kis qadar talKH jawani ki luTi yaaden hain

dekh is daur mein aiwan-e-mohabbat ke liye

kaisi kaisi gham-o-andoh ki buniyaaden hain

kal tere dida-e-hairan se lahu phuTa tha

aaj mere lab-e-KHamosh pe fariyaaden hain

ye mohabbat ye wafaen ye murawwat ye KHulus

in ko sarmae ne be-kar bana rakkha hai

husn aur husn ke har ek sanam-KHane ko

zar-paraston ne jafakar bana rakkha hai

aa ki us daur ka mear badalna hai hamein

jis ne har zehn ko bimar bana rakkha hai

aa ki us jins-e-giran-qadr ko bedar karen

jis ne hum sab ko KHaridar bana rakkha hai

aa ki us fitna-e-zarposh ko uryan kar den

jis ne aafaq ko bazar bana rakkha hai