didani

merī palkoñ ko mat dekho

in kā uThnā in kā jhapaknā jism kā nā-mahsūs amal hai

merī āñkhoñ ko mat dekho

in kī oT meñ shām-e-ġharībāñ in kī aaḌ meñ dasht-e-azal hai

mere chehre ko mat dekho

is meñ koī vāda-e-fardā is meñ koī aaj na kal hai

ab is dariyā tak mat aao jis kī lahreñ TuuT chukī haiñ

is siine se lau na lagāo jis kī nabzeñ chhūT chukī haiñ

ab mere qātil ko chāho

merā qātil marham marham dariyā dariyā sāhil sāhil

qāzi-e-shahr kā māthā chūmo

jis ke qalam meñ zahr-e-halāhal jis ke suḳhan meñ lahn-e-halāhal

ab us raqs kī dhun pe nācho

jis kī giit pe luT gayā qaazī jis kī lai par bik gayā qātil

meri palkon ko mat dekho

in ka uThna in ka jhapakna jism ka na-mahsus amal hai

meri aankhon ko mat dekho

in ki oT mein sham-e-ghariban in ki aaD mein dasht-e-azal hai

mere chehre ko mat dekho

is mein koi wada-e-farda is mein koi aaj na kal hai

ab is dariya tak mat aao jis ki lahren TuT chuki hain

is sine se lau na lagao jis ki nabzen chhuT chuki hain

ab mere qatil ko chaho

mera qatil marham marham dariya dariya sahil sahil

qazi-e-shahr ka matha chumo

jis ke qalam mein zahr-e-halahal jis ke suKHan mein lahn-e-halahal

ab us raqs ki dhun pe nacho

jis ki git pe luT gaya qazi jis ki lai par bik gaya qatil