دل آویز

تیرا چہرہ مرے واسطے ساری دنیا کے پھولوں سے افضل ہوا

کیا ہوا جو کوئی دوسرا

اس کی خوشبو سے مانوس ہو کر اسے لے اڑا

پھول خوشبو تو سب کے لیے ایک جیسے مگر

ان سے محظوظ ہوتے ہر اک شخص کا

رنگ بھی مختلف ڈھنگ بھی مختلف

تم حسیں ہو اور اپنی نوعیت کی واحد حسیں

دل نشیں

بے ضرر

بے تکلف سی معصوم سی بخت ور

بخت ور کیا تمہیں علم ہے

میرے دل میں بنی اک عمارت جسے ہم نے مل کر بنایا لرزنے لگی ہے

ستونوں میں خم آ رہا ہے

مجھے اس عمارت کے بوسیدہ ہونے کا دکھ ہے

اور اس دکھ کی بابت مری آنکھ کی پتلیوں میں ضرورت سے زیادہ نمی ہے

مری زندگی میں خدا کا دیا سب ہے

بس اک تمہاری کمی ہے

جو شاید ہمیشہ رہے گی