din id ka

taklīf kī rāteñ hoñ ki āzār ke din hoñ

mere liye sab marhale āsān rahe haiñ

jab bhī maiñ havādis ke nishāne pe rahā huuñ

mere liye kuchh log pareshān rahe haiñ

ye log mire saath haiñ to ranj-o-alam ko

paspā mujhe karne kī jasārat nahīñ hotī

ye un kī mohabbat hai ki sau qāfile ġham ke

aate haiñ guzar jaate haiñ vahshat nahīñ hotī

un logoñ kā mamnūn huuñ ālām meñ jo log

hote rahe ranjīda alam dekh ke merā

un āñkhoñ kī tauqīr pe qurbān dil-o-jāñ

jin āñkhoñ kā ġham baḌh gayā ġham dekh ke merā

aane na dī talḳhī kahīñ rishtoñ ke safar meñ

jazboñ kī nazākat kā sadā paas thā jin ko

dil-jūī ke ādāb the mā'mūl meñ jin ke

ranj-e-shab-e-zulmāt kā ehsās thā jin ko

jo hausla dete rahe har gaam pe mujh ko

miltī hai ḳhushī koī to yaad aate haiñ vo log

jazbāt kī shāḳhoñ pe khil uThte haiñ hasīñ phuul

ban ke dhanak ehsās pe chhā jaate haiñ vo log

zulmat se bharī raah meñ karne ko ujālā

tābinda ka.ī chehre haiñ yādoñ ke falak par

maiñ kaise bhulā saktā huuñ is bhiiḌ meñ un ko

jo saath chalā karte the sunsān saḌak par

jo log guzarte haiñ musalsal rah-e-dil se

jo log guzarte haiñ musalsal rah-e-dil se

din 'iid kā un ko ho mubārak tah-e-dil se

taklif ki raaten hon ki aazar ke din hon

mere liye sab marhale aasan rahe hain

jab bhi main hawadis ke nishane pe raha hun

mere liye kuchh log pareshan rahe hain

ye log mere sath hain to ranj-o-alam ko

paspa mujhe karne ki jasarat nahin hoti

ye un ki mohabbat hai ki sau qafile gham ke

aate hain guzar jate hain wahshat nahin hoti

un logon ka mamnun hun aalam mein jo log

hote rahe ranjida alam dekh ke mera

un aankhon ki tauqir pe qurban dil-o-jaan

jin aankhon ka gham baDh gaya gham dekh ke mera

aane na di talKHi kahin rishton ke safar mein

jazbon ki nazakat ka sada pas tha jin ko

dil-jui ke aadab the ma'mul mein jin ke

ranj-e-shab-e-zulmat ka ehsas tha jin ko

jo hausla dete rahe har gam pe mujh ko

milti hai KHushi koi to yaad aate hain wo log

jazbaat ki shaKHon pe khil uThte hain hasin phul

ban ke dhanak ehsas pe chha jate hain wo log

zulmat se bhari rah mein karne ko ujala

tabinda kai chehre hain yaadon ke falak par

main kaise bhula sakta hun is bhiD mein un ko

jo sath chala karte the sunsan saDak par

jo log guzarte hain musalsal rah-e-dil se

jo log guzarte hain musalsal rah-e-dil se

din 'id ka un ko ho mubarak tah-e-dil se