dua

kyā yahī zindagī hai ki ham

apne hone kī ḳhushiyāñ manāte raheñ

jism kī lazzatoñ nafs kī shahvatoñ meñ bhaTakte raheñ

saare be-āsrā ġham-gazīdoñ ko ibrat kā zariya samajh kar

apnī āsā.ishoñ ne.amatoñ ke liye sajda-e-shukr meñ apne sar ko jhukāte raheñ

kyā yahī zindagī hai

kyā yahī zindagī hai ki ham

ġhāsiboñ zar-parastoñ se nazreñ churā kar

be-kasoñ be-sahāroñ ko sabr-o-qanā.at kī talqīn karte raheñ

gar yahī zindagī hai to mere ḳhudā

chhīn le ham se apnī ḳhilāfat kā mansab

ki ham vāqa.ī is ke laa.eq nahīñ

varna ai mere rab rahm kar rahm kar

zindagī dī hai ham ko to phir

zindagī kā salīqa sikhā de

kya yahi zindagi hai ki hum

apne hone ki KHushiyan manate rahen

jism ki lazzaton nafs ki shahwaton mein bhaTakte rahen

sare be-asra gham-gazidon ko ibrat ka zariya samajh kar

apni aasaishon neamaton ke liye sajda-e-shukr mein apne sar ko jhukate rahen

kya yahi zindagi hai

kya yahi zindagi hai ki hum

ghasibon zar-paraston se nazren chura kar

be-kason be-sahaaron ko sabr-o-qanaat ki talqin karte rahen

gar yahi zindagi hai to mere KHuda

chhin le hum se apni KHilafat ka mansab

ki hum waqai is ke laeq nahin

warna ai mere rab rahm kar rahm kar

zindagi di hai hum ko to phir

zindagi ka saliqa sikha de