be-nang-o-nam

raat Dhalte hī ik āvāz chalī aatī hai

bhuul bhī jaao ki maiñ ne tumheñ chāhā kab thā

kis sanobar ke tale maiñ ne qasam khaa.ī thī

koī tūfāñ kisī pūnam meñ uThāyā kab thā

merī rātoñ ko kisī dard se nisbat kyā thī

merī sub.hoñ ko duāoñ se ilāqa kab thā

ek mahmil ke sirhāne koī royā thā zarūr

pas-e-mahfil kisī lailā ne pukārā kab thā

tum yūñhī zid meñ hue ḳhāk-e-dar-e-mai-ḳhāna

mujh ko ye zom ki maiñ ne tumheñ Tokā kab thā

tum ne kyuuñ pāka.i-e-dāmāñ kī hikāyat likkhī

mere sar ko kisī dīvār kā saudā kab thā

yaad kam kam hai na chheḌo mire maktūb kī baat

vo muravvat thī faqat harf-e-tamannā kab thā

dil na is tarah dukhā saaf mukarne vaale

mujh ko taslīm ki terī koī taqsīr na thī

ye bajā hai ki tujhe zauq-e-nasheman na milā

ye ġhalat hai ki mujhe hasrat-e-tāmīr na thī

sañg-bārī meñ ye shīshe kā makāñ kis kā hai

is dar-o-bām meñ ḳhushbu-e-vafā kaisī hai

kis kī āvāz se dīvāroñ ke siine meñ figār

mere mābūd mire ghar kī fazā kaisī hai

chhāñv dete nahīñ āñgan ke ghanere ashjār

ġham kī chhā.ī huī ghanghor ghaTā kaisī hai

ek koñpal pe thā añgusht-e-hinā.ī kā nishāñ

ye lahū rotī huī shāḳh-e-hinā kaisī hai

kis kī tasvīr hai ye jis pe gumāñ hotā hai

jaane kab bol uThe uf ye adā kaisī hai

kis ne takiya pe ye kāḌhā hai gire kā misrā

haa.e TuuTī huī nīndoñ kī sazā kaisī hai

soch meñ gum huuñ ki kis kis kī zabāñ band karūñ

aaj shāyad dar o dīvār ko Dhānā hogā

jis meñ tū hai tire vaade haiñ tirī qasmeñ haiñ

kyā sitam hai ki usī ghar ko jalānā hogā

raat Dhalte hi ek aawaz chali aati hai

bhul bhi jao ki main ne tumhein chaha kab tha

kis sanobar ke tale main ne qasam khai thi

koi tufan kisi punam mein uThaya kab tha

meri raaton ko kisi dard se nisbat kya thi

meri subhon ko duaon se ilaqa kab tha

ek mahmil ke sirhane koi roya tha zarur

pas-e-mahfil kisi laila ne pukara kab tha

tum yunhi zid mein hue KHak-e-dar-e-mai-KHana

mujh ko ye zom ki main ne tumhein Toka kab tha

tum ne kyun pakai-e-daman ki hikayat likkhi

mere sar ko kisi diwar ka sauda kab tha

yaad kam kam hai na chheDo mere maktub ki baat

wo murawwat thi faqat harf-e-tamanna kab tha

dil na is tarah dukha saf mukarne wale

mujh ko taslim ki teri koi taqsir na thi

ye baja hai ki tujhe zauq-e-nasheman na mila

ye ghalat hai ki mujhe hasrat-e-tamir na thi

sang-bari mein ye shishe ka makan kis ka hai

is dar-o-baam mein KHushbu-e-wafa kaisi hai

kis ki aawaz se diwaron ke sine mein figar

mere mabud mere ghar ki faza kaisi hai

chhanw dete nahin aangan ke ghanere ashjar

gham ki chhai hui ghanghor ghaTa kaisi hai

ek konpal pe tha angusht-e-hinai ka nishan

ye lahu roti hui shaKH-e-hina kaisi hai

kis ki taswir hai ye jis pe guman hota hai

jaane kab bol uThe uf ye ada kaisi hai

kis ne takiya pe ye kaDha hai gire ka misra

hae TuTi hui nindon ki saza kaisi hai

soch mein gum hun ki kis kis ki zaban band karun

aaj shayad dar o diwar ko Dhana hoga

jis mein tu hai tere wade hain teri qasmen hain

kya sitam hai ki usi ghar ko jalana hoga