mata-e-ghair

mere ḳhvāboñ ke jharokoñ ko sajāne vaalī

tere ḳhvāboñ meñ kahīñ merā guzar hai ki nahīñ

pūchh kar apnī nigāhoñ se batā de mujh ko

merī rātoñ ke muqaddar meñ sahar hai ki nahīñ

chaar din kī ye rifāqat jo rifāqat bhī nahīñ

umr bhar ke liye āzār huī jaatī hai

zindagī yuuñ to hamesha se pareshān sī thī

ab to har saañs girāñ-bār huī jaatī hai

merī ujḌī huī nīndoñ ke shabistānoñ meñ

tū kisī ḳhvāb ke paikar kī tarah aa.ī hai

kabhī apnī sī kabhī ġhair nazar aa.ī hai

kabhī iḳhlās kī mūrat kabhī harjā.ī hai

pyaar par bas to nahīñ hai mirā lekin phir bhī

tū batā de ki tujhe pyaar karūñ yā na karūñ

tū ne ḳhud apne tabassum se jagāyā hai jinheñ

un tamannāoñ kā iz.hār karūñ yā na karūñ

tū kisī aur ke dāman kī kalī hai lekin

merī rāteñ tirī ḳhushbū se basī rahtī haiñ

tū kahīñ bhī ho tire phuul se aariz kī qasam

terī palkeñ mirī āñkhoñ pe jhukī rahtī haiñ

tere hāthoñ kī harārat tire sāñsoñ kī mahak

tairtī rahtī hai ehsās kī pahnā.ī meñ

DhūñDtī rahtī haiñ taḳh.īl kī bāñheñ tujh ko

sard rātoñ kī sulagtī huī tanhā.ī meñ

terā altāf-o-karam ek haqīqat hai magar

ye haqīqat bhī haqīqat meñ fasāna hī na ho

terī mānūs nigāhoñ kā ye mohtāt payām

dil ke ḳhuuñ karne kā ek aur bahāna hī na ho

kaun jaane mire imroz kā fardā kyā hai

qurbateñ baḌh ke pashemān bhī ho jaatī haiñ

dil ke dāman se lipaTtī huī rañgīñ nazreñ

dekhte dekhte anjān bhī ho jaatī haiñ

merī darmāñda javānī kī tamannāoñ ke

muzmahil ḳhvāb kī tābīr batā de mujh ko

tere dāman meñ gulistāñ bhī haiñ vīrāne bhī

merā hāsil merī taqdīr batā de mujh ko

mere KHwabon ke jharokon ko sajaane wali

tere KHwabon mein kahin mera guzar hai ki nahin

puchh kar apni nigahon se bata de mujh ko

meri raaton ke muqaddar mein sahar hai ki nahin

chaar din ki ye rifaqat jo rifaqat bhi nahin

umr bhar ke liye aazar hui jati hai

zindagi yun to hamesha se pareshan si thi

ab to har sans giran-bar hui jati hai

meri ujDi hui nindon ke shabistanon mein

tu kisi KHwab ke paikar ki tarah aai hai

kabhi apni si kabhi ghair nazar aai hai

kabhi iKHlas ki murat kabhi harjai hai

pyar par bas to nahin hai mera lekin phir bhi

tu bata de ki tujhe pyar karun ya na karun

tu ne KHud apne tabassum se jagaya hai jinhen

un tamannaon ka izhaar karun ya na karun

tu kisi aur ke daman ki kali hai lekin

meri raaten teri KHushbu se basi rahti hain

tu kahin bhi ho tere phul se aariz ki qasam

teri palken meri aankhon pe jhuki rahti hain

tere hathon ki hararat tere sanson ki mahak

tairti rahti hai ehsas ki pahnai mein

DhunDti rahti hain taKHil ki banhen tujh ko

sard raaton ki sulagti hui tanhai mein

tera altaf-o-karam ek haqiqat hai magar

ye haqiqat bhi haqiqat mein fasana hi na ho

teri manus nigahon ka ye mohtat payam

dil ke KHun karne ka ek aur bahana hi na ho

kaun jaane mere imroz ka farda kya hai

qurbaten baDh ke pasheman bhi ho jati hain

dil ke daman se lipaTti hui rangin nazren

dekhte dekhte anjaan bhi ho jati hain

meri darmanda jawani ki tamannaon ke

muzmahil KHwab ki tabir bata de mujh ko

tere daman mein gulistan bhi hain virane bhi

mera hasil meri taqdir bata de mujh ko