ek lamha

maiñ apnī zindagī se ek lamhe kā savālī huuñ

vo lamha jo mire naġhmoñ ko chhū kar jāvedāñ kar de

mire dil ko jagā de ruuh ke sho.ale javāñ kar de

na āñkhoñ meñ koī sūrat na koī naam hoñToñ par

na jaane kaun hai jo ruuh ko betāb rakhtā hai

sitāroñ kī tarah aa kar bikhar jaatā hai palkoñ par

na jaane kaun hai jo rāt-bhar be-ḳhvāb rakhtā hai

tumheñ dekhā to khil uThā mire ḳhvāboñ kā ā.īna

vahī nāzuk vahī ma.asūm sā chehra nazar aaya

tumhāre hoñT par bikhrī nazar aa.ī bahār apnī

tumhārā husn apnī ruuh kā hissa nazar aaya

mohabbat jab samundar ban chukī to sochnā kaisā

bahut mumkin hai in lahroñ meñ aa jaa.e kinārā bhī

Dubo de do diloñ ko itnā zālim ho nahīñ saktā

ye tūfāñ jo muqaddar hai tumhārā bhī hamārā bhī

tumhārī aañkh se Tapkā nahīñ ab tak koī aañsū

mire chāroñ taraf tūfān barpā hai qayāmat kā

mirī betāb ummīdoñ ko Thukrā do ki apnā lo

tumhāre faisle par faisla hai merī qismat kā

purānī ho chukī haiñ pyaar ke qadmoñ kī zanjīreñ

na.e raste pe apne aap hī sab TuuT jā.eñgī

hamāre sāmne hogī mohabbat kī na.ī manzil

mileñge ham to ye duniyā kī rasmeñ chhūT jā.eñgī

ye kaalā āsmāñ kuchh bhī nahīñ dhokā hai pal-bhar kā

charāġhāñ hī charāġhāñ ek din mahfil meñ hotā hai

taḌap kar ruuh pe girtī hai yuuñ bijlī mohabbat kī

dhuāñ āñkhoñ se uThtā hai ujālā dil meñ hotā hai

machaltā hai jo dil meñ aur hoñToñ tak nahīñ aatā

mohabbat kī tarah vo giit bhī ma.asūm hotā hai

sunātī hai tumhārī aañkh jab koī hasīñ naġhma

to mujh ko vaqt bhī Thahrā huā ma.alūm hotā hai

ye pyāse ḳhvāb ye vīrān shāmeñ aur ye tanhā.ī

tumhārī ruuh se bichhḌā huā āvāra saayā huuñ

abhī tak mere dil kā dard pahchānā nahīñ tum ne

jo palkoñ par nahīñ aate vo aañsū saath laayā huuñ

mohabbat jab kisī sangam pe miltī hai mohabbat se

to aisī lahr aatī hai ki duniyā bhiig jaatī hai

sulagtī dhaḌkaneñ palkoñ se chhan chhan kar barastī haiñ

zabāñ ḳhāmosh rahtī hai nazar va.ada nibhātī hai

tum aanā chāhtī ho dil kī dhaḌkan rok detī hai

ye kaisī kashmakash hai paañv rukte haiñ na chalte haiñ

na iqrār-e-tamanna hai na inkār-e-mohabbat hai

ye kaise diip haiñ zālim ki bujhte haiñ na jalte haiñ

maiñ apnī zindagī se ek lamha chhīn laayā huuñ

churā kar zindagī se koī lamha tum bhī le aao

mire hāthoñ meñ ik sāz-e-mohabbat hai bahut din se

bahāroñ kā koī ma.asūm naġhma tum bhī le aao

ham in naġhmoñ se ik bahtā huā dariyā banā Dāleñ

bhulā kar saarī duniyā ik na.ī duniyā banā Dāleñ

parāyā sā hai jo lamha use apnā banā Dāleñ

main apni zindagi se ek lamhe ka sawali hun

wo lamha jo mere naghmon ko chhu kar jawedan kar de

mere dil ko jaga de ruh ke shoale jawan kar de

na aankhon mein koi surat na koi nam honTon par

na jaane kaun hai jo ruh ko betab rakhta hai

sitaron ki tarah aa kar bikhar jata hai palkon par

na jaane kaun hai jo raat-bhar be-KHwab rakhta hai

tumhein dekha to khil uTha mere KHwabon ka aaina

wahi nazuk wahi masum sa chehra nazar aaya

tumhaare honT par bikhri nazar aai bahaar apni

tumhaara husn apni ruh ka hissa nazar aaya

mohabbat jab samundar ban chuki to sochna kaisa

bahut mumkin hai in lahron mein aa jae kinara bhi

Dubo de do dilon ko itna zalim ho nahin sakta

ye tufan jo muqaddar hai tumhaara bhi hamara bhi

tumhaari aankh se Tapka nahin ab tak koi aansu

mere chaaron taraf tufan barpa hai qayamat ka

meri betab ummidon ko Thukra do ki apna lo

tumhaare faisle par faisla hai meri qismat ka

purani ho chuki hain pyar ke qadmon ki zanjiren

nae raste pe apne aap hi sab TuT jaengi

hamare samne hogi mohabbat ki nai manzil

milenge hum to ye duniya ki rasmen chhuT jaengi

ye kala aasman kuchh bhi nahin dhoka hai pal-bhar ka

charaghan hi charaghan ek din mahfil mein hota hai

taDap kar ruh pe girti hai yun bijli mohabbat ki

dhuan aankhon se uThta hai ujala dil mein hota hai

machalta hai jo dil mein aur honTon tak nahin aata

mohabbat ki tarah wo git bhi masum hota hai

sunati hai tumhaari aankh jab koi hasin naghma

to mujh ko waqt bhi Thahra hua malum hota hai

ye pyase KHwab ye viran shamen aur ye tanhai

tumhaari ruh se bichhDa hua aawara saya hun

abhi tak mere dil ka dard pahchana nahin tum ne

jo palkon par nahin aate wo aansu sath laya hun

mohabbat jab kisi sangam pe milti hai mohabbat se

to aisi lahr aati hai ki duniya bhig jati hai

sulagti dhaDkanen palkon se chhan chhan kar barasti hain

zaban KHamosh rahti hai nazar wada nibhati hai

tum aana chahti ho dil ki dhaDkan rok deti hai

ye kaisi kashmakash hai panw rukte hain na chalte hain

na iqrar-e-tamanna hai na inkar-e-mohabbat hai

ye kaise dip hain zalim ki bujhte hain na jalte hain

main apni zindagi se ek lamha chhin laya hun

chura kar zindagi se koi lamha tum bhi le aao

mere hathon mein ek saz-e-mohabbat hai bahut din se

bahaaron ka koi masum naghma tum bhi le aao

hum in naghmon se ek bahta hua dariya bana Dalen

bhula kar sari duniya ek nai duniya bana Dalen

paraya sa hai jo lamha use apna bana Dalen