ek mahbus nazm

darvāza piiTā jā rahā hai

mere jism par zaḳhm aur niil, hare hote jā rahe haiñ

mujhe yaad aayā

gandī gāliyāñ aur maile būToñ kī bhārī eḌiyāñ

mere āsāb aur jism ko shal kar rahī thiiñ

kandhoñ kūlhoñ aur rānoñ par

bad-bū-dār dāñtoñ ke nishān

dahaktī salāḳhoñ se miTāne kī koshish bhī kī ga.ī

maiñ ūñchī khiḌkī se chhalāñg lagā saktā thaa!

magar saada kāġhaz par dastaḳhat ke baġhair

mujhe is suhulat kī ijāzat bhī nahīñ dī ga.ī

vo sab mere zinda hāthoñ se ziyādā

merī murda āñkhoñ se ḳhauf-zada the shāyad

maiñ ne unheñ batā diyā thā

ki maiñ sirf be-maqsad zindagī

aur be vaq.at maut se Dartā huuñ

maiñ ne kahā

zaḳhmī dāñtoñ ke saath mujh se hañsā nahīñ jaatā

laao kāġhaz idhar laao

maiñ us par ek zor-dār qahqaha likh kar dastaḳhat kar duuñ

mujhe yaad hai

vo thak haar ke behosh hone chale ga.e the

gandī gāliyoñ aur būToñ kī

bhārī eḌiyoñ ke saath

darvāza phir piiTā jā rahā hai!

darwaza piTa ja raha hai

mere jism par zaKHm aur nil, hare hote ja rahe hain

mujhe yaad aaya

gandi galiyan aur maile buTon ki bhaari eDiyan

mere aasab aur jism ko shal kar rahi thin

kandhon kulhon aur ranon par

bad-bu-dar danton ke nishan

dahakti salaKHon se miTane ki koshish bhi ki gai

main unchi khiDki se chhalang laga sakta tha!

magar sada kaghaz par dastaKHat ke baghair

mujhe is suhulat ki ijazat bhi nahin di gai

wo sab mere zinda hathon se ziyaada

meri murda aankhon se KHauf-zada the shayad

main ne unhen bata diya tha

ki main sirf be-maqsad zindagi

aur be waqat maut se Darta hun

main ne kaha

zaKHmi danton ke sath mujh se hansa nahin jata

lao kaghaz idhar lao

main us par ek zor-dar qahqaha likh kar dastaKHat kar dun

mujhe yaad hai

wo thak haar ke behosh hone chale gae the

gandi galiyon aur buTon ki

bhaari eDiyon ke sath

darwaza phir piTa ja raha hai!