farz aur qarz

jo muslim hai to jaañ nāmūs-e-millat par fidā kar de

ḳhudā kā farz aur us ke nabī kā qarz adā kar de

bharī mahfil meñ lā saktā na ho gar kufr taab us kī

to zindāñ hī meñ jā kar raushan īmāñ kā diyā kar de

shahādat kī tamanna ho to añgrezī hukūmat par

kisī majlis ke andar nukta-chīnī barmalā kar de

tumhārā qāfila kuchh luT chukā aur kuchh hai luTne ko

rasūlullāh ko is kī ḳhabar bād-e-sabā kar de

zarūrat hai ab is ījād kī dānā-e-maġhrib ko

jo ahl-e-hind ke dāman ko cholī se judā kar de

nikal aane ko hai sūraj ki mashriq meñ ujālā ho

baras jaane ko hai bādal ki gulshan ko harā kar de

qafas kī tīliyoñ par āshiyāñ kā kaaT kar chakkar

falak se gir paḌe bijlī ki bulbul ko rihā kar de

ye hai pahchān ḳhāsān-e-ḳhudā kī har zamāne meñ

ki ḳhush ho kar ḳhudā un ko giraftār-e-balā kar de

jo muslim hai to jaan namus-e-millat par fida kar de

KHuda ka farz aur us ke nabi ka qarz ada kar de

bhari mahfil mein la sakta na ho gar kufr tab us ki

to zindan hi mein ja kar raushan iman ka diya kar de

shahadat ki tamanna ho to angrezi hukumat par

kisi majlis ke andar nukta-chini barmala kar de

tumhaara qafila kuchh luT chuka aur kuchh hai luTne ko

rasulullah ko is ki KHabar baad-e-saba kar de

zarurat hai ab is ijad ki dana-e-maghrib ko

jo ahl-e-hind ke daman ko choli se juda kar de

nikal aane ko hai suraj ki mashriq mein ujala ho

baras jaane ko hai baadal ki gulshan ko hara kar de

qafas ki tiliyon par aashiyan ka kaT kar chakkar

falak se gir paDe bijli ki bulbul ko riha kar de

ye hai pahchan KHasan-e-KHuda ki har zamane mein

ki KHush ho kar KHuda un ko giraftar-e-bala kar de